Dili, 30 Janeiru 2026 (Média Democracia) – Sekretáriu Estadu Kooperativa (SECoop) liuhusi Diresaun Delegasaun Munisipal indetifika ona Munisipiu sira ne’ebé iha potensia hodi produs masin hanesan Munisipiu Bobonaro, Likisa ho Manatutu.
Tuir Diretór Nasionál Delegasaun Munisipal Rui Soares hateten, ekipa SECoop sei halo levamentu dadus atu produs masin iha Munisipiu Bobonaro, Likisa ho Manatutu, tanba Munisipiu hirak ne’e iha pontensia boot ba produsaun masin.
“Ita halo ona sensibilizasaun no agora OJE 2026 atu preve osan produs masin fase da-ruak. Iha fulan Marsu tinan ida ne’e hahú halo sensibilizasaun no fó formasaun bazika ba ekipa produsaun masin, kona-ba oinsá atu produs masin iha Munisipiu tolu ne’e.” Dehan Diretór Nasionál Delegasaun Munisipal Rui Soares
Nia hatutan Governu liuhusi Sekretáriu Estadu Kooperativa (SECoop) iha OJE 2026 iha kategoria rua hanesan Bens Serbisu no ida seluk atu halo sensibilizasaun ba komunidade sira hodi hatene saida mak atu halo iha terrenu.
“Orsamentu ne’ebé atu tau ba programa produs masin ne’e ha’u seidauk hatene, tanba kada Diresaun iha idak-idak nia servisu, Ha’u hatene de’it mak osan refere sei fahe ba parte rua hanesan sensibilizasaun no formasaun bazika, kona-ba montante hira, ha’u seidauk hatene lolos. Aleinde ne’e ita-nia komunidade sira ne’ebé hakarak harii grupu, entaun ita tenke halo sensibilizasaun ba sira atu nune’e forma sira sai grupu Kooperativa hodi produs masin.” Hatutan Diretór Nasionál Delegasaun Munisipal
Nia subliña tan, progresu produs masin agora daudaun lao hela no ita seidauk integra formasaun bazika ba grupu sira atu habelar tan grupu sira seluk, tanba komunidade balun hakarak mós involve-a’an iha grupu balun.
Reportajen : Estajiadu Marito
Foto : Marito