Dili, 08 Janeiru 2025 (Média Democracia) – Marcos Soares de Jesus ho idade 70 husi Munisípiu Ermera Postu-Administrativu Letefoho Suku Hapu Aldeia Assi, daudaun ne’e hela iha Tasi-Tolu loron-loron servisu hanesan hili lata-mamuk no kalen-aat iha dalan ninin
Tuir Marcos Soares de Jesus hateten durante ne’e hili lata-mamuk no kalen-aat iha dalan ninin husi tasi-tolu ba to’o fatuhada no manleuna depois hodi ba halibur hamutuk iha uma, kada semana foin mak bele tetu nune’e bele hetan osan hodi haree nia kaben
“Ha’u maske idade boot ona maibé ha’u nafatin halo servisu tuir kbiit ne’ebé iha tanba ita tur de’it iha osan sei la mosu ne’ebé buat hotu ita tenke esforsu-aan. Maske lao iha loron manas no udan nia laran maibé ida ne’e nesesidade nia obriga hodi deside halo servisu tuir forsa.” Dehan Marcos Soares de Jesus
Nia hatutan durante hala’o atividade servisu hili lata-mamuk no kalen-aat iha ema balun sempre hakribi tanba sempre hili lata-mamuk iha foer nia laran maibé nafatin esforsu-aan hodi lao nafatin tanba buat hotu-hotu sei iha mudansa tuir nia tempo bainhira ita fiar ba maromak nia akompañamentu no atividade sei lao ho di’ak
“Ha’u iha oan nain lima feto rua (2) no mane tolu (3), maibé daudaun ne’e iha kaben na’in hotu ona ne’ebé ida-idak hela hamutuk ho sira nia kaben hodi tau matan ba sira nia familia uma laran iha tempu ruma mak mai haree ha’u ho ha’u nia kaben. Daudaun ne’e buat hotu ha’u tenke esforsu hodi buka osan nune’e bele sustenta ami nain rua nia presiza loron-loron nian. Ha’u fiar katak buat ne’ebé ha’u halo hodi grasa maromak nia akompañamentu buat hotu sei lao di’ak.” Dehan nia
Nia salienta lata-mamuk no besi-aat ne’ebé nia hetan barak liu iha lixu fatin, kanu-kuak no jardin tanba ema sempre halibur hamutuk iha fatin sira hanesan ne’e maibé tenke fuan boot tanba lata-mamuk ne’ebé belit iha baleta kuak nakonu ho foer
“Lata-mamuk no kalen-aat ne’e ha’u hetan tau hamutuk iha sakola laran to’o nakonu hafoin lori ba halibur hamutuk iha uma to’o semana ida foin bele tetu. Tanba ha’u atu lori direta ba fatin tetu-kalen ha’u la hatene ne’ebé ha’u sempre hein de’it ema lori gerobak buka lata-mamuk no besi-aat atu tetu hafoin ha’u bele tetu entaun kada semana ha’u hetan osan ho rendimentu ne’ebé naton hanesan $5.00 too $7.00 bainhira ema mai tetu kalen-aat iha uma.” Nia afirma
Esplika kle’an liután katak Marcos maske idade ne’ebé la serve atu halo servisu ona maibé tanba de’it nesesidade nia obriga nia deside halo atividade servisu ki’ik tuir forsa no kbiit ne’ebé nia iha tanba tur de’it iha uma buat hotu sei la mosu. Hanesan xefe familia tenke esforsu-aan nune’e bele hetan osan ituan hodi sustenta ba presiza loro-loron nian ne’ebé sei prezensa iha mundu.
Reportajen : Nelfiano
Foto : Nelfiano