Dili, 19 Janeiru 2026 (Média Democracia) – Ministeriu Asuntus Kombatentes Libertasaun Nasionál (MAKLN), realiza konferensia hodi deklara kona-ba osan Veteranus nian ne’ebé tansfere ona ba iha benefisiáriu sira ida-idak ninia númeru konta-bankária, sei la fila-fali ba kofre estadu tanba Kombatentes no Mártir sira-nia direitu. Konferensia refere hala’o Sala reuniaun Gabinéte MAKLN Comoro.
Ministru Asuntu Kombatentes Libertasaun Nasionál MAKLN Gil da Costa Monteiro “Oan Soru” hateten, husu nafatin ba Inan no Aman Veteranus ho família Mártir sira hatudu dixiplina hodi la’o tuir de’it oráriu ne’ebé estabelese ona, la presiza ba forma no sena malu tanba benefisiáriu foti tarde fixa pagamentu osan sei lakon ho nune’e ekipa tekniku sira nafatin halo atendimentu ba inan-aman sira.
“Ami nafatin fó hateten ba Inan-Aman sira katak osan ne’ebé transfere ona Ita-boot sira-nia konta bankaria la lakon sei la fila-fali ba konfre Estadu. Maske ita-boot mai hein sente kleur hakarak fila-fali ba uma mós di’ak depois mai fali, ekipa nafatin halo atendimentu ne’e tanba imi nia diretu. Dalaruma inan-aman balun hili dalan seluk hakarak toba hein nune’e fasil ba sira atu asesu lalais. Aleinde sira lao ba mai sente kolen ita mós komprende tanba balun idade no balun familia iha Dili laiha entaun sira deside toba hein de’it, buat sira ne’e hotu tanba kondisaun mak obriga, fiar katak ba oin sei hadia di’ak liután ba asuntu sira ne’e.” Dehan Ministru Asuntu Kombatentes Libertasaun Nasionál MAKLN, Gil da Costa Monteiro “Oan Soru”
Ministru Asuntu Kombatentes Libertasaun Nasionál hatutan, haree kona-ba regra loloos atu foti osan ne’e tenke liuhusi uluk Tékniku DNPS (Diresaun Nasionál ba Pensaun no Subvensoens), atu bele atualiza sira nia estadu fiziku ida agora, nune’e ba futuru atu kontrola. Haree iha tempu uluk nian iha failansu barak hodi hamosu liafuan ida dehan veteranu falsu, tanba iha ema balun trata dokumentus husi kotu-kotuk hodi simu osan veteranu nian.
“Ha’u nu’udar Ministru Asuntu Kombatentes Libertasaun Nasionál sempre defende Veteranus la Falsu maibé iha ema balun mak falsifika dadus hodi hetan pensaun, karik Veteranu ne’e falsu entaun Repúblika Demokrátika Timor-Leste (RDTL) mós falsu hotu. Ha’u sempre hateten ba públiku katak, Veteranu ne’e la falsu. Ema mak falsifika dokumentus sai Veteranus. Karik veteranu ne’e falsu, RDTL mós falsu. Ne’e respósta ida ba públiku no ha’u hatene katak, resposta ne’e iha ninia fatin.” Hatutan Ministru Asuntu Kombatentes Libertasaun Nasionál MAKLN
Ministru afirma, benefisiáriu sira ne’ebé elejível ona hodi simu osan iha ámbitu pagamentu pensaun veteranus faze da-huluk nian ida-ne’e hamutuk 15,697. Kombatente hirak ne’e mai husi Segundu-Rejistu tinan 2009 nian ne’ebé anunsia iha lísta editál ne’ebé MAKLN ho CCLN fó sai iha loron 15 fulan-Janeiru 2025 nia laran.
Esplika liután tuir dadus progresu atribuisaun fixa pagamentu nian ne’ebé Tékniku sira atribui ona hahú husi loron 15 fulan-Dezembru to’o loron Fulan-Janeiru 2026, atinje ona rihun-ualu, atus-neen, hitu-nulu resin-sia (8.679). Maibé ida ne’e seidauk hotu tanba inan-aman sira nafatin mai nune’e numeru sei aumenta fiar servisu neneik atende inan-aman sira to’o remata.
Reportajen : Nelfiano
Foto : Media MAKLN