Dili, 16 Maiu 2025 (Média Democracia) – Padre Paroquia Nossa Señora do Carmo Letefoho Padre Helio deklara, sarani katolika Timor-Leste lakon sira nia bibi atan ida ne’ebé servi ho fuan no domin, durante nia viajen moris to’o hakotu nia peregrinasaun iha mundu.
Iha entrevista ho Padre Helio fernandez hateten, ohin sarani hotu rona no haree ona husi média sosial ba falesimentu Padre Domingos da Silva Soares “Maubere” ne’ebé ohin dader hakotu nia peregrinasaun iha tuku 7:05 oras Timor-Leste, husi novidade ida ne’e Dioceses sira tur hamutuk ho familia husi Padre Maubere hodi esplika situasaun sira ne’ebé sei mosu iha tempu badak ka koalia kona-ba orariu ligadu ho falesimentu Amu Maubere nian.
“Horiseik ami nafatin tur hamutuk ho familia husi Amu Maubere nian iha komunikasaun ida ne’ebé diak tebes no ohin iha orariu balun ne’ebé ita lao ona mak hamutuk ho sarani sira selebra eukaristia ba falesimentu Amu Maubere. Iha komunikasaun ne’ebé durante ne’e husi familia Kardeal rona familia sira nia preokupasaun no hanoin familia husu atu Amu Maubere bele hetan fatin kalan ida hamutuk ho sarani husi Parokia Letefoho tanba Padre Maubere hanesan bibi atan ida ne’ebé servi nia sarani ho fuan no domin tomak.” Dehan Padre Helio fernandez
Nia hatutan, maktoban Padre Maubere sei tula ho aviaun ne’ebé apoiu husi Timor Gap hodi lori maktoban ba to’o iha Postu-Administrativu Letefoho, nune’e orsida kalan sarani sira husi Parokia Letefoho bele mai presta sira nia omenajem ikus ba maktoban Padre Maubere, tanba durante ne’e Padre Maubere ema ida ne’ebé diak tebes servisu la hatene kole nomos la hatene hirus nia sarani sira durante nia hala’o nia vokasaun hanesan Padre iha paroquia sira.
“Ita hotu sente triste sente lakon tanba padre maubere ne’e hanesan bibi atan ida ne’ebé servisu la hatene kole, la hatene baruk no la hatene moras, durante nia moris nia oferese nia-an tomak hodi servi ba nia sarani sira no ohin ita hotu lakon ona nia tanba nia hakotu ona peregrinasaun iha mundu ida ne’e.” Hatutan Padre Helio fernandez
Nia hatutan orariu iha Parokia Letefoho Munisipiu Ermera mak sei organiza suku sia ne’ebé iha Postu-Administrativu Letefoho nian atu bele mai presta omenajem nomos halo orasaun ba maktoban Amu Maubere, nomos orariu aban sei prezide misa iha Parokia Nossa Señora do Carmo Letefoho dader no tuku 11:00 sei desloka fila-fali maktoban Padre Domingos Maubere mai Dili atu nune’e sei kontinua orariu ba missa funebre nomos halot maktoban iha fatin deskansa ikus nian iha simiteriu maloa Dili.
Reportajen : Domingas
Foto : Domingas