Dili, 15 Novembru 2024 (Média Democracia) – Autoridade Munisípiu Dili sei Avalia polítika ho lei hodi haree tuir rate ne’ebé hakoi iha uma sorin no iha kintal laran.
Prezidente Autoridade Munisípiu Dili Gregório Saldanha haktuir lia-hirak ne’e katak rate labele halo iha uma sorin ka kintal laran.
“Primeiru rate labele halo iha uma sorin ka kintal laran, rate tenki tau iha nia fatin duni, maibé ita sei haree polítika para oinsá bele haree tuir lei ne’e tenki tuir nia dalan duni hodi kuda fali rate sira ne’e ba rate públiku ka rate sira ne’ebé hakoi ema bar barak.” Dehan PAM Dili ba jornalista Media Democracia iha Santa Cruz Tersa ne’e (12/11/24)
Autoridade Munisípiu ne’e sei koordena ho família sira ne’ebé halo rate iha uma sorin maibé sei prepara hela regulamentu balun.
“Rate iha uma ita haree ona no sei koordena ho familia para muda, maibé buat sira ne’e tenki iha regulamentu, ami prepara regulamentu sira atu haree buat sira ne’e, iha lei bandu katak labele hakoi iha uma sorin, iha regulamentu fasilita ne’e fasil liu atu públiku bele komprende maibé sira la halo tuir hotu.” Nia afirma
Tanba Munisípiu Dili iha buat barak mak sei presiza rezolve no hadi’a, nune’e tenke kria planu ona hodi bele implementa.
“Munisípiu Dili ne’e buat barak la halimar, la’ós buat ida de’it ita sei la’o hotu haree buat sira ne’e, labele rezolve ohin kedas, labele kalan ita mehi ohin rezolve lae, ita sei la’o tuir dalan, la’o tuir forsa orsamental, buat sira ne’e hotu.” Nia dehan
Entretantu tuir observasaun Jornalista nota katak iha Munisípiu Dili rasik sei iha família balun ne’ebé dadaun ne’e seidauk muda rate husi ambiente uma ba iha Semitériu Públiku ne’ebé eziste iha kapitál.
Reportajen : Estefania
Foto : Estefania