Dili, 17 Juñu 2025 (Média Democracia) – Provedoria Direitus Humanus no Justisa (PDHJ), liuhusi kooperasaun instituisional ho Programa Dezenvolvimentu Nasoes Unidas (PNUD) hala’o workshoop kona-ba Monitorizasaun no Avalisaun husi implementasaun tinan lima 2021-2025 PAE-Ehd 2021-2030. Workshop ne’e hala’o iha Salaun Catedral Vila-Verde Dili, Segunda semana ne’e.
Provedoria Direitus Humanus no Justisa, Virgilio da Silva Guterres hateten, objetivu ba workshop ida ohin kona-ba planu Asaun Nasionál ba EhD iha tinan lima hodi fahe ba liñas Ministerial sira rezultadu levantamentu husi PDHJ halo liuhusi unidade analiza dezenvolvimentu legal administrativa ba Ministeriu 11 no grupo alvu sira.
“Ha’u hanoin objetivu husi workshop ida ne’e atu fahe ba públiku liuhusi entidades ne’ebé ami konvida hamutuk liña Ministeriais representante husi sosiedade sivil nomos grupu sira seluk. Ami atu hato’o rezultadu levantamentu ne’ebé PDHJ halo liuhusi unidade whatsapp, unidade analiza dezenvolvimentu legal administrativu ba Ministeriu sanulu resin ida (11) ho públiku inklui grupu alvu sira hotu.” Dehan PDHJ, Virgilio da Silva Guterres “Lamukan”
Provedoria Direitus Humanus no Justisa (PDHJ), informa dezafiu ne’ebé hetan husi Ema ho Defisiensia sira ne’ebé kontinua lamenta inkonsistensia ba Estadu no Governu kona-ba prinsípiu inkluzividade no dezenvolvimentu espasu públiku kona-ba estrada seidauk asesu ba ema ho defisiensia sira.
“Iha buat balun ami hakarak foti sai dezafiu ita-nia maluk defisiensia sira kontinua lamenta kona-ba inkonsistensia ita-nia Estadu Governu kona-ba prinsipiu inkluzividade, ita haree iha Dili ezemplu dezenvolvimentu ba estrada espasu públiku sira seidauk konsidera asesu ba maluk ho defisiensia sira.” Dehan Provedoria
Nia informa iha Administrasaun Públika haree promosaun oportunidade ba ema ho defisiensia sei minimu, tanba ne’e iha mensajen barak husi entidades públika ba de’it ema la ho defisiensia, maibé ema ho defisiensia mensajen seidauk to’o tanba laiha lingua jestaun, ida ne’e dezafiu ne’ebé PDHJ infrenta.
“Ohin ha’u hatete ona EhD sira lamenta tanba dezenvolvimentu konseitu kona-ba inkluzaun ne’e sei menus, entaun hanesan ohin, invez ita mak lori servisu ne’e ba ema ho defisiensia maibé ita obriga sira tenke mai hodi partisipa.” Nia haktuir
Nia afirma dezenvolvimentu ba ema ho defisiensia sei menus tanba ne’e sira lamenta ho dezenvolvimentu hanesan espasu públiku no estrada iha liña Ministerial liu-liu administrativa atu fó atendimentu la inklusivu, tanba EhD mós iha direitu ba asesu administrativu no dezenvolvimentu asesu públiku nian.
Ministeriu Edukasaun (ME) Sefi Tekniku Inklusivu (TI), José Monteiru hateten, Planu Asaun Nasionál (PAN), Ema ho Defisiensia (EhD) ne’ebé liuhusi workshop ida ne’e hodi kontinua halo monitorizasaun ba planu Asaun Nasionál ba ema ho defisiensia hodi lao tuir iha Ministeriu 13 ne’ebé hala’o ona planu Asaun Nasionál EhD nian.
“Implementasaun planu asaun nasionál ba ema ho defisiensia tanba Ministeriu lubuk ida mak servisu tuir ida-idak nia área liuhusi workshop ne’e bazeia ba PDHJ nia diskursu di’ak tebes nafatin monitorin no akompaña, nune’e implementasaun planu Asaun Nasionál ne’e tenke la’o tuir kada Ministeriu (11) ho ida-idak ninia papel.” Dehan reprezentan Ministeriu Edukasaun Xefe Tekniku Inklusivu (TI), José Monteiru
Nia afirma tuir lolos Ministeriu (13) mak hala’o Planu Asaun Nasionál ba Ema ho Defisiensia maibé Ministeriu rua tama tan, Ministeriu finansas no Ministeriu Estatal, ne’ebé laos Ministeriu (11) maibé Ministeriu (13) maka implementa Planu Asaun Nasionál ba Ema ho Defisiensia ne’e.
“Ministeriu ne’ebé involve aan iha defisiensia husi Ministeriu Edukasaun nia programa barak liu Ministeriu sira seluk, nune’e planu husi Ministeriu Edukasaun hamutuk 12 hamutuk ho nia indikadores lubuk hotu durante ne’e implementa programa planu asaun nasionál kada Ministeriu ida-idak nian.” Nia subliña
Nia reafirma Planu Asaun Nasionál ba Ema ho Defisiensia husi 2021 to’o 2030 nia laran konsege implementa ona programa ba maluk defisiensia sira hotu bele asesu maibé fiar katak iha tinan lima mai tan sei implementa programa barak liután ba Ema ho Defisiensia ba iha liña Ministeriu sira hotu.
Repotajen : Nelfiano
Foto : Nelfiano