Dili, 17 Outubru 2025 (Média Democracia) – Primeiru-Ministru (PM), Kay Rala Xanana Gusmão, hasoru malu ho Prezidente Repúblika (PR), José Ramos-Horta hodi enkontru semenal relata desizaun no polítika ne’ebé Governu foti iha semana ikus ne’e haree ba iha Orsamento Jeral Estadu tinan 2026 nian.
Iha entrevista ho Primeiru Ministru Kay Rala Xanana Gusmão hateten, Ohin mai hasoru ho Prezidente Repúblika hodi relata kona-ba OJE 2026 ne’ebé hatama ona ba Parlamentu Nasionál iha loron 01 Fulan Outubru tinan 2025 no iha loron 05 to’o 07 Fulan Novembru tinan 2025 sei debate no votasaun iha jeneralidade, no iha loron 10 to’o loron 24 Fulan Novembru Tinan 2025 sei debate no votasaun iha espesialidade no votasaun globál, iha loron 25 Novembru sei haruka mai Prezidente Repúblika hodi promulga.
Antes tama debate OJE 2026, ohin PN hamutuk ho Governu hahú semináriu Panorama ba Orsamentál nian iha Ministériu Finansa. Ohin Parlamentu Nasionál hamutuk ho Governu Kontinua semináriu panorama ba Orsamental nian.
Aleinde ne’e, Xefe Governante ne’e mós informa kona-ba Timor-Leste nia preparasaun tama Asosiasaun Nasaun Sudeste Aziátiku (ASEAN), ida-ne’e la’ós fásil maibé husu ba Governante sira tenke prepara iha setór legál nomós setor sira seluk prepara hotu ona antes atu adezasaun ba iha Asean.
Preparasaun Timor-Leste nian tama ba Asosiasaun Nasaun Sudeste Aziátiku (ASEAN), ida-ne’e la’ós fásil maibé buat hotu tenke preparadu, iha setór legál tenke prepara-an ona, nune’e servisu tenke la’o ho di’ak antes tama ba ASEAN. durante reuniaun, nia parte informa mós ba PR katak horisheik Konsellu Ministru aprova rezolusaun ida kona-ba Sekretariadu Komunidade País Ko’alia Lian Portugés (CPLP, sigla portugés) iha Lisboa.
Tanba foin daudaun ne’e reuniaun iha Ángola sira hotu husu dehan hatama ema iha Sekretariadu ne’e la’ós rai ida ka rua de’it, maibé kontempla rai hotu membru CPLP tenke tuir konkursu no tenke iha igualidade jéneru. Nune’e mós, informa katak Parlamentu nia proposta Rezolusaun daruak ho objetivu atu ratifika akordu entre Timor-Leste no Repúblika ho Ángola kona-ba inzensaun vistu ba titulár pasaporte diplomátiku no serbisu nian mós iha ona prosesu nian laran.
PM Xanana konklui enkontru ho Prezidente Republika José Ramos Horta PM informa mós kona-ba horiseik aprova akordu ida entre Timor-Leste no Laos kona-ba troka direitu utilizasaun rai no edifísiu husi misaun diplomata sira, katak sira fó rai ruma iha ne’ebá fó ba Embaixada ka Konsuladu karik iha Timor mós tenke fó Rai iha ne’e ba Embaixada ka konseladu sira.
Reportajen : Domingas
Foto : Media PM