Dili, 04 Jullu 2025 (Média Democracia) – Plataforma Nasionál Bee Saneamentu no Ijiene Timor-Leste (PN-BESI-TL), realiza workshop ho tema “Aprezentasaun Rezultadu Asesimentu Instituisional ba iha setor Bee Saneamentu Ijiene.” Workshop ne’e hala’o Salaun Fongtil Caicoli, Kinta semana ne’e.
Koordenador PN-BESI-TL Januário Amaral hateten, objetivu husi workshop ida ne’e hamutuk ho ekipa liu-liu Plataforma Nasional Bee Saneamentu no Ijiene Timor-Leste hamutuk ho parseiru ONG LA’O HAMUTUK realiza asesementu Instituisional ho parseiru dezenvolvementu sira ne’ebé durante iha tinan 20 resin fó apoiu maka’as ba Governu liu-liu óinsa bele garante dezenvolvementu setor Bee Saneamentu Ijiene Timor-Leste.
“Aktividade ida ohin ne’e ita foku tinan 20 resik ne’e tomak maibé ita haree de’it husi tinan 2018 to’o mai 2023 ne’ebé ita atu haree parseiru dezenvolvimentu sira liu-liu oinsa sira apoiu entermus materia inklui mós apoiu moral ba ita-nia governu atu nune’e atinji metas ne’ebé governu atras ona.” Koordenador PN-BESI-TL Januário Amaral
Nia hatutan foku prinsipal ida ne’e liu-liu haree mapamentu intervensaun iha setor bee no seanamentu Timor-Leste liu-liu parseiru dezenvolvimentu sira-nia apoiu no orasamentu hirak mak parseiru sira apoiu ona, tanba konsiente durante problema ne’ebé Estadu hasoru laiha dadus.
“Durante ne’e governu mós laiha dadus ka mapamentu ne’ebé klaru kona-ba intervensaun parseiru sira-nia apoiu liu-liu foku ba setor Bee Seanamentu no Ijiene iha Timor-Leste. Aleinde ne’e iha Munisipiu balun intervensaun ne’ebé dupla organizasaun tolu mak iha Munisipiu balun laiha ona.” Hatutan Koordenador PN-BESI-TL
Nia afirma, governu mós ladun tau atensaun didi’ak ba Munisípiu balun ne’ebé halerik hela ba Bee-moos. Haree ba probelema ne’e PN-BESI-TL hamutuk ho parseiru ONG LA’O HAMUTUK halo aseamentu nasional ida ba ajensia sira atu indentifika lolos durante Munisípiu no area ida ne’ebé orasamentu hirak mak durante ne’e parseiru sira apoiu ona hahú husi tinan 2018-2023 nian laran.
Iha fatin hanesan Koordenadora ONG LA’O HAMUTUK, Marta da Silva hateten, relasiona ho atividade ne’e nia objetivu óinsa atu ajuda hodi haree kona-ba dadus iha planeamentu maske halo “deskreviu” ba dadus ne’ebé tama husi ajensia sira seluk inklui portal número ne’ebé la konsiste.
“Ita-nia dadus kobertura tinan ida ne’e sa’e mós nia la asegura katak, tinan oin nia lamantein tinan oin nia bele tuna fali, tanba kestaun operasaun mak manutensaun nian sei menus atu kontrola.” Dehan Koordenadora ONG LA’O HAMUTUK, Marta da Silva
Nia hatutan ONG LA’O HAMUTUK ho parseiru PN-BESI-TL realiza ona asesmentu institusionál liu-liu ba Parseiru Dezenvolvimentu sira (NGO Internasionál) mak durante ne’e apoiu ona Governu ba dezenvolvimentu iha setór Bee, Saneamentu no Ijiene iha Timor-Leste husi Tinan 2018-2023.
Iha sorin seluk reprezentante Prezidente Operasaun Manutensaun Bee Timor-Leste (BTL.Ep), Alexo dos Santos hateten, Bee no Seanamentu iha área urbana tanba BTL ne’e hari’i atu responde nesesidade baziku liu-liu kona-ba Bee no Saneamentu iha Munisípiu liu-liu iha área Urbana.
“Plataforma Nasional ba Bee, Saneamentu no Ijiene Timor-Leste (PN-BESI-TL) hanesan Asosiasaun servisu iha setór Bee Moos, Saneamentu no Edukasaun Ijiene ne’ebé hari’i husi Organizasaun Naun-Governamentál lokál sira ne’ebé servisu iha setór refere. Aleinde ne’e ita mós sai prioridade ba area urbana no Postu-Administrativu inklui kapital Munisípiu.” Dehan Reprezentante Operasaun Manutensaun Bee Timor-Leste, Aleixo dos Santos
Nia hatutan durante existentes BTL.Ep komesa tama ona iha Postu-Administrativu hamutuk 48, maibé daudaun ne’e aumenta tan Postu-Administrativu foun rua entaun hamutuk 50.
“Dezenu implementasaun iha tinan ida ne’e ita mós bele inagura ba Bee-moos hamutuk 20 iha Postu-Administrativu. Signifika ita durante ita responde nesesidade Bee-Moos ba komunidade iha Munisípiu liu-liu iha área urbana ba futuru, ita-nia ekipa iha Munisípiu kontinua servisu maka’as nune’e komunidade sira bele asesu Bee moos ho di’ak ba nesesidade.” Hatutan Reprezentante Operasaun Manutensaun Bee Timor-Leste
Nia informa, iha Munisípiu kapital sira iha tinan ida ne’e BTL.Ep iha ona fainel hetan husi Ministériu, iha konkluzaun ida husi Banku Mundial IDB sei implementa iha Munisípiu rua Manufahi no Lautem. Detaillu dezenu ne’e kompletu ona hamutuk Munisípiu 5 Dili, Baucau, Lautem, Manufahi no Viqueque, maibé ita implementa uluk iha Munisípiu rua Manufahi no Lautem.
Esplika liután razaun prinsipál husi estabelesimentu asosiasaun ne’e óinsa atu hola papél iha servisu advókasia ba setór Bee, Saneamentu no ljiene iha Timor-Leste, hanesan prosesu ida atu garante partisipasaun ONG nasionál sira hodi tau matan ba prosesu politika no dezenvolvimentu setór Bee, Saneamentu no Ijiene iha Timor Leste, nune’e bele lori dezenvolvimentu neʼebé inkluzivu ba Povu liga ho setór Bee, Saneamentu no Ijiene iha Timor-Leste.
Reportajen : Nelfiano
Foto : Nelfiano