Dili, 12 Marsu 2026 (Media Democracia)– Orsamentu Policia Nacional Timor Leste tinan 2026 aloka cerca 43 milioes dolar ba saláriu no vensimentu polísia sira, no 5 milões dolar ba beins de servisus no kapitál menor, hanesan manutensaun viaturas, kombustível no nesesidade ofísiu, atu suporta servisu operasionál no garante ordem públiku no estabilidade iha Timor-Leste.
Komandante Komandu Administrasaun PNTL Superintendente Xefe Polísia José Soares ba Jornalista sira iha Komandu Jerál PNTL hatete katak 43 milões mak kobre ba iha saláriu no vensimentu ne’e tanba ita haree iha númeru polísia ne’ebé boot, barak nune’e mós ita-nia adidu sira ne’ebé koloka iha nasaun haat hanesan iha Indonézia, portugal, australia ni malázia
“iha 43 milões mak kobre ba iha saláriu no vensimentu ne’e tanba ita haree iha númeru polísia ne’ebé boot, barak nune’e mós ita-nia adidu sira ne’ebé koloka iha nasaun haat hanesan iha Indonézia, portugal, australia ni malázia, no depois ita haree ba meius ne’ebé atu halo servisu ba iha servisu operasionais sira iha terrenu presiza viaturas, presiza manutensaun, presiza kombuztivel atu nune’e bele garantia meius sira ne’e bele iha kondisaun ne’ebé di’ak para bele garante ordem públiku iha Timor-Leste.” Dehan Komandante Komandu Administrasaun PNTL Superintendente Xefe Polísia José Soares
Nia dehan, nune’e garante estabilidade iha ita-nia nasaun ida ne’e hodi kontribui ba Timor-Leste ne’ebé faz parte ona iha ASEAN nune’e mós kontribui ba iha paz ba mundiál maske iha geopolítika iha tensaun, iha kontestamentu entre estadu poderes sira maibé, ita hanesan nasaun ki’ik ita tenke hatudu an ne’ebé nakonu ho hakmatek iha paz nia laran.
Hafoin Komisáriu Henrique da Costa halo abertura, departamentu administrasaun finansas entrega kedas livru orsamentu ba iha Komandante Munisípiu no Unidade sira.
“Depois de komandante jerál halo abertura, intervensaun, iha ikus mai husi parte administrasaun, finansas no departamentu sira ita entrega livru orsamentu ba iha komandante munisípiu sira, Unidade sira, xefe departamentu sira nune’e sira bele iha hodi hatene sira-nia orsamentu hira, sira bele hahú ina halo pedidus mai komando.” Nia informa
Nia informa, orsamentu 43 milhões ne’e, 5 Milhõe ne’e aloka ba bens servisus no kapitál menor.
“43 milões ne’e ba saláriu de’it ne’e atu kobre ba saláriu, iha 5 milhões ne’e mak kobre ba beins de servisus ho kapitál menor ne’e mak hadi’a kareta sira ne’e, sosa kombustível, pesas sira ne’e ho nesesida de ofísiu nian.” Nia adianta
Enkuantu objetivu husi enkontru ne’e, Komandu Jerál Polísia Nasionál Timor-Leste realiza enkontru ho komandante munisípiu, unidade, xefe departamentu no diretór diresaun sira hodi fahe livru orsamentu fiskál 2026, atu sira hatene alokasaun orsamentu no bele hahú ezekusaun programa no atividade sira iha kada estrutura PNTL.
Komandante munisípiu, unidade no departamentu sira bele haree livru orsamentu ne’ebé atribui ba sira no halo pedidu ba Komando Jerál, atu depois prosesa liu husi departamentu relevante hanesan finansas hodi prepara CPVS ba prosesu aprovizionamentu.
Reportajen : Estefania
Foto : Estefania