Dili, 11 Marsu 2026 (Media Democracia)- Policia Nacional Timor Leste Eskuadra Cristo-Rei asegura JRO ne’ebé abandona Bebé iha Hospital Nasionál Guido Valadares, iha loron kuarta tuku 0.6 ne’e suspeitu ne’e rasik direita ba kedas Hospitál hodi koopera no entrega an ba PNTL.
“Nia prosesu de kontinuasaun husi horseik buka tuir to’o ninia paradeiru hetan ona, entaun iha madrugada ne’e, inan ne’e rasik entrega nia an, entaun liuhusi parte husi ospitál hasoru kedas tiha ona ninia oan iha ne’ebá, entaun kontinua hodi kedas nia mai iha eskuadra hodi kanaliza bebé nia Ama agora ba iha VPU Munisípiu Dili para hodi kontinua ba iha prosesu.” Dehan Komandante Eskuadra Cristo-Rei Inspetor Xefe Polísia, Paulino de Carvalho ba jornalista sira iha nia knaar fatin, Becora, Kuarta ne’e(11/03/2026)
Inspetór Xefe Polísia ne’e informa, Bebé nia inan ne’e entrega an hafoin akompaña notísia ne’ebé fó sai husi Média sira.
“Nia voluntariamente entrega an tanba nia mós horkalan akompaña notísia ne’ebé ke ita publika nia mós akompaña hotu, entaun iha dadersan ne’e ita hetan ona nia paradeiru para bele foti kedas nia iha dadersan tuku neen (06) mai iha ospitál.” Dehan Nia
Nia afirma, kazu ne’e rasik nia prosesu identifikasaun hela nune’e belenhatene kona-ba konteúdeu husi problema ne’e rasik.
“Prosesu hotu-hotu, primeiru ita halai ba identifikasaun ba iha ne’ebá hodi hatene konteúdu nia problema oinsá mak to’o nia husik hela ninia oan rasik, entaun ho situasaun sira ne’e iha ne’ebá parte VPU mak sei bele kanaliza iha Ministériu Públiku.” Nia haktuir
Kona-ba kauza husi kazu parte PNTL lai envolve miabé variedade husi ne’e Ministériu Públiku mak iha desizaun.
“Kauza ida ne’e só orsida iha desizaun Ministériu Públiku mak hatene klean liu, ita labele ko’alia ema-nia privasidade buat hotu-hotu segredu, entaun ida ne’e so ministériu públiku to’o iha tribunál mak hatene nia variedade, direitamente nia hatene ona saida mak nia halo nia hatene, nia konversa.” Nia dehan
Enkuantu kazu ne’e rasik oras ne’e dadaun iha ona VPU Munisípiu Dili tanba PNTL Eskuadra Cristo-Rei Entrega ona, depois hein nia kontinuasaun.
Kona-ba halo detensaun ba Bebé nia Inan ne’e desizaun iha VPU, PNTL nia parte buka tuir de’it suspeitu.
“Ita atu halo detensaun ne’e orsida sira parte VPU, ha’u so esforsu hodi buka bebé nia mamá, saida mak horseik ha’u ko’alia 24 oras de tempu mas la to’o 24 oras, tanba ho situasaun sira ne’e hotu ho ha’u nia esforsu tan de’it bebé ne’ebé iha ospital, agora paradeiru ninia inan agora iha ona ita-nia liman orsida ita-boot sira bele kontinua ba iha parte VPU para hodi bele hetan klareza informasau ne’ebé detail iha VPU.” Nia Adianta
Entretantu, Komandante Eskuadra Cristo-Rei Inspetor Xefe Polísia, Paulino de Carvalho deklara kona-ba Bebé nia aman nia parte la hatene tanba prosesu investigasaun iha VPU munisípiu Dili.
Reportajen : Estefania
Foto : Estefania