Dili, 11 Abríl 2026 (Media Democracia)- Diretór Servisu Investigasaun Kriminál (DNSIC-sigla Portugues) Superintendente Xefe Polísia João Belo dos Reis, informa Polísia asegura sidadaun ida ho insiál A tanba hetan suspetadu envolve iha atividade ilísitu “broker” ba atendimentu dokumentu ofisiál Estadu nian.
“Ohin Diresaun Nasionál Servisu Investigasaun Kriminál asegura sidadaun balun tanba sidadaun ne’e públika informasaun bele trata dokumentu ofisiál nasaun nian hotu-hotu, sertidaun BI, karta kondúsaunn no seluk-seluk .” Deha João Belo ba jornalista sira iha nia kna’ar fatin Kuartel Jerál PNTL Sesta ne’e.
Dadaun ne’e polísia asegura ona Suspeitu tanba iha ofendidu balun ne’ebé sente sai ona vítima ba hahalok suspeitu nian nune’e sira mai halo denúnsia no polísia halo kedan monitorizasaun ba suspeitu ne’e ninian hahalok.
Diretór DNSIK ne’e esklarese katak, durante ne’e suspeitu ‘A’ halo nia asaun liuhusi nia konta facebook ho naran MMN hodi husu ema katak nia bele trata dokumentu ofisiál nasaun nian hotu hanesan Billte Identifika, Sertidaun Moris, Rejistu Kriminál, Pasaporte no Karta Kondusaun.
“Superentente João hateten, suspeitu nu’udar membru ida husi empreza RAI MAKMOR ne’ebé mak bosok ema atu trata dokumentu, ita konsidera ne’e fraglante delitu tanba dokumentu sira ne’ebé nia uza lori husik ema hodi trata ema nia dokumentu hodi lansa informasaun falsu iha nia liman ne’ebé ami agora asegura ona.” nia informa.
Nia adianta, evidensia sira ne’ebé Polísia asegura mak hanesan dokumentu sertidaun RDTL, BI kopia balun no mós kartaun eletorál, dokumentu falsu sira ne’e nia uza lansa informasaun katak liuhusi nia dokumentu sira ne’e trata ho lalais iha tempu badak.
Nune’e mós polísia halo apreensaun ba motór ida ne’ebé durante suspeitu uza halo nia atividade .
Belo informa, durante ne’e suspeitu ema selu ho osan $20 dólar to’o $100 dóllar hodi halo atividade ilísitu ne’e.
Diretór Servisu Investigasaun Kriminál Nasionál ne’e hateten, agora dadaun Servisu Investigasaun Kriminál halo hela komunikasaun ho Ministeriu Públiku atu halo prosesu kontinuasaun ba suspeitu ne’e.
“ Agora dadaun prosesu investigasaun ba nia la’o hela.” Nia akresenta
Tanba ne’e Superintendente Xefe Polísia ne’e husu ba públiku katak atu trata dokumentu ofisiál Estadu nian hanesan BI, Pasaporte no ba trata direta iha Notariadu, karik ema ruma oferese aan atu trata dokumentu iha liur karik check didi’ak.
“Karik ema ruma mak oferese aan atu trata dokumentu iha liur karik informa ba ami hodi ami halo atuasaun.” Dehan Belo
Entretantu, kazu ne’e Servisu Investigasaun Kriminál simu informasaun husi vítima sira ne’ebé sai vítima ba suspeitu nia hahalok nune’e iha kuarta (8/4) foin DNSIK hamutuk komunidade intelenjensia observa kedan suspeitu ne’e nia movimentu no iha sesta ohin (10/4) tuku 9:00 dader ne’e iha área Taibesi polísia asegura kedan suspeitu ne’e ho fraglante delitu tanba suspeitu A halo hela nia asaun ne’e iha instituisaun balun.
Hafoin polísia halo tiha atusaun ba sidadaun ne’e ne’e lori kedan mak iha Servisu Investigasaun Kriminál Nasionál Kuartel Jerál PNTL Kaikoli hodi submete ba prosesu identifikasaun.
Reportajen : Estefania Cardoso
Foto : Estefania Cardoso