Dili, 11 Fevereiru 2026 (Média Democracia) – Polisia Nasionál Timor-Leste, liuhusi Komandu Munisípiu Díli kontinua kaptura tan suseitu na’in rua ba kazu violasaun, koasaun seksuál no raptu ne’ebé akontese iha Hera Hali-Dolar iha loron 28 fulan Dezembru 2025.
Komandante PNTL Munisípiu Díli, Superientendente Xefe Polisia Orlando Gomes hateten, PNTL Munisípiu Dili halo kapturasaun ba Suspeitu sira bazeia ba Tribunál Judisiál Primeira Instánsia Díli nia mandadu ne’ebé hasai kona-ba mandadu detensaun ho Nuc: 0487/25.DIBCR, hodi buka tuir no kaptura suspeitu sira hodi aprezenta ba Tribunál atu bele responsabiliza ba aktu ne’ebé sira komete tuir lei ne’ebé vigora ona.
Antes ne’e, Autoridade Polísia kaptura ona suspeitu na’in-rua ho inisiál JG ho UF no iha loron segunda (09/02), kaptura tan suspeitu na’in-rua ho inisiál IX ho MN ne’ebé deskonfia envolve mós iha kazu refere.
“Relasiona kazu violasaun no kazu koasaun seksuál ho raptu akontese iha loron 28 fulan Dezembru tinan 2025, iha Postu-Administrativu Kristu-Rei, área Hali Dolar, Hera, iha semana ida liubá, kaptura ona arguidu na’in-rua ho inisiál JG ho UF no aprezenta ona ba iha Tribunál oras ne’e daudaun sira ba ona iha pena prizaun preventive. Iha Segunda ne’e, kaptura tan suspeitu na’in rua ho inisiál IX ho MN hodi detein iha sela detensaun Polísia hodi aprezenta ba Tribunal iha oras 72 nia laran.” Komandante PNTL Munisípiu Díli, Superientendente Xefe Polisia Orlando Gomes informa ba jornalista sira iha Eskuadra Polísia Dom Aleixo, Tersa-feira (10/02/2026)
Komandante PNTL Munisípiu Díli informa, Na’in rua ne’e kaptura iha área Vera-Cruz nian maske iha suspeitu ida mak la kolabora ho parte seguransa maibé konsege kaptura lori mai detein iha Komandu Munisípiu Dili.
“Arguidu inisial IX kaptura iha Caicoli no MN kaptura iha área Santa Cruz nian. Suspeita ho inisial MN kolabora di’ak ho PNTL sira, tanba nia mai aprezenta-an iha komnadu, no suspeitu IX la kolabora di’ak ho polisia, maibé ita nafatin foti nia mai.” Informa Komandante PNTL Munisípiu Díli
Enkuantu Suspeitu nain rua ho ainisiál JG ho UF ne’ebé antes ne’e kaptura, lori ba aprezenta ona iha tribunal no hatun ona despaixu Prizaun Preventiva, no Komandu Munisípiu Dili nafatin kompri bainhira mandadu husi Tribunal tun ba komandu Dili.
Entretantu iha loron Kinta (05-02-2026) Seksaun Polísia Investigasaun Munisípiu Dili kaptura Suspeitu JG iha Lospalos Vila lori to’o mai iha Komandu Munisípiu Dili mais ou menus tuku 18.00 liu. No iha loron Sexta (06‐02-2026), polísia seksaun investigasaun kontinua ba kaptura Suspeitu UF iha Ainaro no kontinua mai asegura iha komandu Munisípiu Dili iha oras 16.00 liu.
Suspeitu hirak ne’e lori kedas ba iha edifísiu Sub-Seksaun Polísia Unidade Vulnerabilidade (VPU) no kontinua ba detein iha sela Polísia.
Reportajen : Estefania
Foto : Estefania