Dili 11 Setembru 2025 (Média Democracia)- Iha sorumutuk PNTL no EUTL, Polísia Nasionál Timor-Leste (PNTL) la konkorda Estudante Universitáriu Timor-Leste (EUTL) atu halo manifestasaun iha resintu Universidade Nasionál Timor-Lorosae iha loron 15 Fulan Setembru 2025 tanba PNTL konsidera fatin ne’e besik liu Parlamentu Nasionál.
Komandante Komandu Operasaun Nasionál Superintente Xefe Polísia Justinho Menezes hatete, ohin Komandu Operasaun Nasionál hamutuk ho Komandante PNTL no Komandante Unidade Espesiál Polísia Diretór Diresaun sira inklui Xefe Departamentu Komandu PNTL halo enkontru ho Estudante Universitáriu Timor-Leste EUTL hodi ko’alia kona- ba aseitsaun fatin ba veikulu 65.
“Ita aseita sira bele halo espresaun polítika, hanoin kontra desizaun liuhusi manifestasaun, ita aseita, tanba ne’e ita bolu sira atu ita define fatin. Maibé liuhusi reuniaun ohin ne’e sira (estudante Universitáriu) mantein no lakohi muda sira-nia pozisaun katak sira hakarak halo manifestasaun iha resintu Univeridade Nasionál Timor-Leste UNTL, maibé ida besik liu resintu Parlamentu Nasionál tuir lei ne’e labele.” Komandante Komandu Operasaun Nasionál PNTL ne’e hateten ba jornalista sira hafoin hasoru malu ho Portavós EUTL iha Komandu Jerál PNTL Kaikoli kuarta ne’e.
Nia hatutan, PNTL sei autoriza estudante sira halo asaun enkontru no konferensia imprensa iha areadores UNTL de’it, ne’e polísia apoia fó seguransa, maibé atu halo manifestasaun no halo asaun sai too li’ur ne’e polísia la autoriza.
Tanba tuir lei númeru 1/2006 artigu 13 iha ne’ebá autoridade polísial mak sei define fatin ba reuniaun sira, no husi lei ne’e hateten manifestasaun tenke 100 metru husi fatin públiku edifisiu Estadu sira, entaun iha Dili laran ne’e laiha.
“Tanba ne’e ohin ita define hodi hateten ba sira katak sira bele halo manifestasaun, maibé hala’o iha Tasi-Tolu, depois ita bele akompaña too fulan ida ka semana ida ka rua laiha problema.” Dehan Komandante Komandu Operasaun Nasionál PNTL
Portavoz Informa, PNTL konkorda fatin ne’ebé determina ba sira maka iha Tasi-tolu maibé sira mantein halo iha resintu UNTL entaun ohin ne’e polisia hateten la autoriza no PNTL husu Portavóz Universitariu fila fali hodi konsulta ho sira-nia superiór lai.
“Ami deside fatin manifestasaun ne’e Tasi-tolu iha ne’ebá ne’e livre no konfortavél atu sira bele espresa sira-nia hanoin. Maibé sira la aseita, ida ne’e mak sira sei fila fali ba konsulta, tanba manifestasaun ne’ebé atu halo iha dia 15 Setembru 2025 ami sei kansela. Tanba fatin ba manifestasaun nian sira lakonkorda iha Tasi-tolu maibé sira hakarak de’it iha aredores UNTL, maibé ne’e labele.” Nia afirma.
Nia relata, kuandu estudante universitariu sira viola polísia sei foti medida tuir lei haruka. Tanba ne’e hakarak apela ba alin estudante sira desizaun ba manifestasaun ne’e tenke desizaun kolletivu liu-liu kona-ba fatin ba manifestasaun nian.
“Ami espera sira bele ba deside para ami bele iha resposta lalais nune’e sira mak fali ita bele deside tempu demostrasaun.” Nia afirma.
Komandante Komandu Operasaun Nasionál, subliña kuandu estudante sira ne’e viola hodi halo nafatin iha fatin ne’ebé sira hili mak autoridade seguransa sei la fó. Sé sira la kumpri fatin ne’ebé Polisia define Polísia dehan labele, hateten ba sira labele halo, sira tenke kumpre. Hakarak manifestasaun ne’e la’o di’ak pasífiku tenke lao fatin ne’ebé polisia define ona. Tanba dadaun ne’e PNTL simu de’it karta husi Estudante Universitariu Timor-Leste ne’ebé iha sira-nia karta ne’e dehan demostrasaun enkuantu Sosiedade Sivil karta laiha.
“Dadaun ne’e Polísia simu de’it karta husi estudante sosiedade sivil lae estudante universidade Timor-Leste. Kuandu demostrasaun mak mosu buat ruma pntl sei husu responsabilidade ba portavos sira. Tanba sira nia karta ne’e sira promete katak sira deit, maibé sira seluk mak tama entaun mak sei halo atuasaun.” Nia reafirma.
Tuir lei númeru 1/2006 katak se mak hakarak halo manifestasaun nia tenke iha karta koñesimentu ba polísia. Polísia mak define fatin ne’ebé halo manifestasaun tanba ne’e hotu-hotu tenke halo tuir koridor lei refere.
Hatutan husi portavoz estudante Universidade Timor Leste dehan (EUTL) Natalício Nunes informa durante audiênsia ho Komandu PNTL laiha konsensu kona ba fatin atu halo manifestasaun hasoru Parlamentu Nasionál (PN), kona-ba desizaun sosa kareta foun.
“Ami hatama ona karta, ami halo karta liu loron rua sira la fo resposta, signifika aseita ona ami-nia karta, maibe iha loron tersa PNTL sira kontaktu ami liu hosi via telefone katak atu halo audiênsia ho EUTL, nune’e ohin ami ba halo enkontru ho PNTL”. Dehan portavoz ba jornalista Democracia
Nia hatutan iha enkontru, sira la aseita atu uza fatin ka areadores UNTL nian tanba besik Liu ba iha areadores Parlamentu Nasionál maibe ami haree katak fatin ne’e mak estratéjiku atu halo manifestasaun, nune’e ohin ami reunião no ami la aseita desizaun husi PNTL nian, ami deside mantein uza fatin ne’ebé ami mensiona iha karta koñesimentu ne katak ami sei halo manifestasaun iha areadores UNTL nian.
Esplika liután ligadu ho kestaun ne’ebé komandu PNTL deklara katak bainhira EUTL nafatin halo manifestasaun iha areadores resintu UNTL PNTL sei halo kapturasaun, EUTL prontu simu dezafiu saida de’it mak mosu iha loron 15 Setembru no EUTL sei asegura manifestasaun sira ho di’ak, garante paz no estabilidade hodi kontra Parlamentu Nasional kona-ba desizaun sosa kareta ba deputadu.
Reporttajen :Domingas
Foto : Domingas