Dili, 27 Janeiru 2026 (Média Democracia) – Polísia Nasional Timor-Leste asegura ona joven na’in haat (4), relasiona ho konflitu iha área Tibar Postu-Administrativu Bazartete, Munisípiu Liquiça. Lia-hirak ne’e hato’o husi Diretór Diresaun Servisu Investigasaun Kriminál (DSIK), Superintendente Polísia João Belo dos Reis iha Komandu Jerál PNTL Caicoli, Dili.
Superintendente Polísia João Belo dos Reis hateten, konflitu ne’e akontese mais ou menus tuku 19.00 ho balun entre grupu rua iha parte Tibar.
“Iha inisiu konflitu ne’ebé akontese iha tuku 7 ho balun Grupo Arte Ritual inisial C2000 ho komunidade area Riheu Tibar nian, rejulta mós kareta ida hetan estragus no komunidade ida hetan kanek iha parte ulun.” Dehan João Belo ba jornalista sira iha Segunda ne’e (26/01)
Diretór Diresaun Servisu Investigasaun Kriminál hatutan, akontesimentu ne’e akontese hafoin grupu arte ritual ho inisiál C2000 fila husi Peregrina iha Munisípiu Ermera hodi tuir Inagura Gruta Sagrada Coração de Jesus “Haehria Kukata” iha munisípiu Ermera.
“Grupu C2000 ne’e fila husi Ermera fila hakilar tutuir dalan to mai iha area Riheu Tibar nian hakilar malu ho komunidade husi Sucu Tibar nian hodi rejulta uma ida hetan sunu, kareta ida hetan estragus no komunidade ida hetan kanek, hafoin ami husi Autoridade Seguransa PNTL kaptura Suspeitu nain 4 husi parte 2. Ami kaptura ho evidensia mak samurai no tudik ne’ebé sira utiliza hela.” Hatutan Superintendente Polísia João Belo dos Reis
Superintendente ne’e afirma, iha akontesimentu ne’e suspeitu nain haat (4) sei prosesu hela no suspeitu sira seluk ne’ebé involve iha konflitu refere parte Autoridade Seguransa PNTL sei buka tuir atu bele kaptura hodi prosesa hotu.
“Ita-nia Autoridade Seguransa PNTL husi Investigasaun Kriminál Munisípiu Liquiça oras ne’e lao hela no sei rekolla evidensia sira hotu no ami enkoraza ba vitima sira bele fó relatoriu ba estragus ne’ebé sira enfrenta ba Autoridade Seguransa PNTL hodi bele hatene.” Afirma Superintendente Polísia
Iha akontese konflitu ne’e, Unidade Intervensaun Rapida no Unidade Espesiál Polísia (UEP) inklui Forsa Rezerva tun kedas iha terenu hodi asegura no normaliza situasaun.
“Agora Komandu Munisípiu Liquiça kontinua asegura sidadaun iha tibar no buka tuir suspeitu sira ne’ebé envolve iha laran, tanba ita kaptura ona Suspeitu nain 4, agora dadaun ami detein iha sela Komandu Munisípiu Liquiça, nune’e ami pela ba suspeitu sira ne’ebé involve-an iha konflitu aprezenta-an mai ami, liu-liu autor sira ne’ebé sunu uma no estragus komunidade nia uma.” Subliña Superintendente Polísia João Belo dos Reis
Parte Autoridade Seguransa PNTL husu mós ba komunidade sira atu evita ba konflitu ne’ebé la nesesáriu, karik iha buat ruma rejolve ho ulun malirin atu imi labele sai vitima, no imi nia sasan labele hetan estragus.
Joven nain haat (4) ne’e ho naran (Inisial), SBS idade 17 anos, DR idade 30 anos, MFG idade 38 anos, no SS idade 43 anos.
Jornalista : Estefánia Cardoso
Foto : Estefánia Cardoso