Dili, 30 Marsu 2026 (Média Democracia) – Komandante Jerál PNTL Komisáriu Asisténte Polísia Afonso dos Santos, hateten PNTL preparadu asegura misa semana santa iha ambitu paskoa nian. Nomos orientassun Komandu nian sempre serbisu hamutuk ho militár sira, nune’e garantia problema sei la iha.
Enkuantu, Komandante Munisípiu Dili Komisáriu Asisténte Polísia Orlando Gomes informa, Komandu Munisípiu hetan ona orientasaun husi Komandante Jerál atu koloka seguransa ba iha paskoa hahú iha kinta-feira Santa to’o Domingu da Resureisaun.
“Komandu Munisípiu Dili ita prepara tiha ona planu operasaun ba seguransa ba festa paskoa ninian, agora iha planu operasaun ita koloka ita-nia membru sira ba iha Igreja sira iha kapital Dili nomos kolokasaun ba seguransa ne’ebé Igreja realiza prosesaun sira ne’e, Atu nune’e bele asegura prosesaun sira ne’e bele la’o di’ak.” Informa Komandante Munisípiu Dili Komisáriu Asisténte Polísia Orlando Gomes
Orlando Gomes hatutan, dadahn ne’e Igreja sira iha kapitál Dili, liliu iha Parokia sira ne’e, tuir planu operasaun ne’ebé Komandu PNTL Munisípiu Dili iha katak koloka membru Tranzitu sira atu organiza transporte hodi labele hamosu engarrafamentu.
“Ita sei koloka membru tranzitu sira hodi organiza tranposte sira para labele iha engarafamentu atu karreta sira hotu-hotu bele para ho di’ak, Planu ita preapadu ona, ita-nia membru sira sei breafing para molok sira hala’o sira-nia servisu iha terenu.” Hatutan Komandante Munisípiu Dili Komisáriu Asisténte
Nia afirma katak, planu operasaun ba Paskoa ne’e hetan mós apoiu husi Unidade Espesiál Polísi, Unidade Máritima, nomos hetan apoiu parseiru Polisiamentu Komunitária.
“Ita orienta ona ba iha Eskudra sira atu fó hatene OPS sira koordena ho Prezidente KPK membru sira tomak para fó apoiu seguransa iha tempu paskoa ninian.” Afirma Komandante Munisípiu Dili Komisáriu Asisténte Polísia
Komandante PNTL Munisípiu Dili apela ba sarani, joven no komunidade sira iha Munisípiu Dili ita prepara ita nian aan lakleur ita tama ona ba paskoa presiza ita-nia kolaborasaun, ita-nia kontribuisaun para atu nune’e ita bele asegura seguransa iha semana santa bele la’o di’ak. Liliu Komandu Munisípiu Dili husu ba joven sira ne’ebé dala ruma kalan ho motorizada, kalan ho grupu-grupu ita husu para atu hapara, nune’e tau atensaun di’ak ba loron semana santa ninian, ita bele ultrapasa serimónia ho di’ak.
Nia mós husu ba sidadaun hotu-hotu atu hamutuk fó hanoin ba malu hodi kontribui ba estabilidade iha kapitál Dili.
“Ita-nia kapitál Dili la’ós Polísia mesak de’it, maibé husu ba povu, komunidade no joven sira, atu nune’e serbisu hamutuk ho Komandu Munisípiu, liuhusi ita-nia Eskudra sira, ita-nia Ofisiál Polísia Suku sira para nune’e ita hotu tau atensaun hodi seguransa kapital Dili.” Informa Komandante Munisípiu Dili Komisáriu Asisténte Polísia Orlando Gomes
Antes tama semana santa Komandu Munisípiu Dili orienta ona ba Eskudra, Seksaun sira iha Komandu Dili para molok atu tama ba iha semana santa ka paskoa ninian nafatin halo patrollamentu ho karreta, patrollamentu la’o ain ba iha bairru para atu halo prevensaun konflitu sira ne’ebé mosu iha bairru bairru sira.
“Tanba dala ruma akompaña iha bairru bairru dala ruma mosu konflitu, tanba ne’e ita lansa ona ita nia intelenjensia sira, ita-nia Ofisiál Polísia Suku sira mós ba ko’alia ho ita-nia komunidade sira iha bairru.” Subliña Komandante Munisípiu Dili Komisáriu Asisténte Polísia Orlando Gomes
Aleinde ne’e, Komandante UEP Superintendente Xefe Polísia Damiao Correia hateten, kona-ba seguransa ba Paskoa nian ne’e normál ne’e la’ós buat foun tanba ne’e Unidade Espesiál sempre prontu apoia Komandu Munisípiu Dili fó seguransa estabilidade liliu ba iha festa paskoa nian ba iha territóriu tomak la’os iha kapital Dili de’it.
Iha kompañia ne’ebé iha kolokasaun iha kompañia Branvo ne’e e responsavél ba iha parte leste nian, kompañia Delta ne’ebé responsalvél ba parte Oeste nian tantu REOA ne’ebé iha kolokasaun permante iha ne’ebá, nune’e prontu ona hodi garante seguransa estabilidade iha festa paskoa.
Reportajen : Estefania
Foto : Estefania