Dili, 10 Outubru 2025 (Média Democracia) – Komandu Polísia Nasional Timor-Leste (PNTL) realiza komunikadu imprensa relasiona ho Polisia Munisípiu Covalima iha loron 06 fulan Outubru tinan 2025 hala’o operasaun iha area Salele, fatin naran Casabauk, Komandante Munisípiu ho nia ekipa halo iha oras tuku rua madrugada hetan movimentu iha tasi ibun parte Casabauk nian ne’ebé deskonfia iha Transaksaun Ilegal. Konferensia ne’e Média Democracia asesu iha pajina PNTL Kinta semana ne’e.
Porta-voz Komandu PNTL Superintendente Polisia João Belo dos Reis hateten iha konferensia, baseia ba informasaun ne’ebé sira kolekta halo intervensaun detekta katak ema estrangeiru deskonfia sidadaun Xinesa, importa sasan illegal mai ho Ró bo’ot hafoin transfere ba Ró ki’ik sira hodi transporta mai iha Tasi ibun, husi ne’e detekta Sigaru ho marka Malboro hamutuk 388 kaixa (Karton), Bero ha’at (4) no Kareta ida, suspeitu sira halai hotu laiha fatin.
“Dadaun ne’e prosesu investigasaun sei lao hela, ita tenta atu bolu sira ne’ebé nu’udar motor na’in no kareta na’in ne’ebé para hela iha ne’eba hodi husu sira-nia responsabilidade. Prosesu identifikasaun lao hela, espera orsida lokoraik ita bele aprezenta ona ba Ministeriu Públiku (MP).” Dehan Porta-voz Komandu PNTL Superintendente Polísia, João Belo dos Reis
Porta-voz hatutan, bainhira ekipa konjuntu ne’ebé lidera husi Komandante Munisípiu tu’un ba terenu, suspeitu sira hala’i namkari inklui sidadaun Xinesa ne’e rasik, motor hamutuk walu no kareta ida maka para hela iha Estrada tanba ne’e sei husu sira-nia responsabilidade.
Esplika liután Komandu alerta nafatin ba Membru sira iha Munisípiu hotu-hotu, Unidade espesial sira hanesan UPM, UEP no UPF atu alerta nafatin tanba Sigaru ílisitu ne’ebé tama iha nasaun hamosu prezuizu bo’ot ba Estadu, husi Intervensaun husi Casabauk ne’e de’it Estadu lakon kuaze osan Rihun Atus-hitu-limanulu resin dolar Amerikanu ne’ebé tuir lolos suspeitu sira selu Taxa ba Estadu.
Reportajen : Nelfiano
Foto : Media PNTL