Dili, 22 Dezembru 2025 (Média Democracia) – Komandu Nasional Polisia Nasional Timor-Leste sei garante situasaun siguransa iha loron boot Natal nomos tinan foun nian iha Timor-Leste, nune’e labele mosu konflitu ruma hodi kria pas estabilidade no hamonia. Informasaun refere Media Democracia asesu husi pajina ofisial PNTL Segunda semana ne’e.
Komandante Jerál Polisia Nasional Timor-Leste (PNTL) Komisariu Jerál Polisia Henrique da Costa hateten, dadaun ne’e komandu PNTL hasai ona diretiva operasaun ba komandu PNTL Munisípiu no Unidade sira hotu hasa’e patroillamentu hodi garante seguransa iha ambitu selebrasaun natal no tinan foun iha Territoriu Timor-Leste.
“Daudaun ne’e ita hasai ona diretiva ba komandu PNTL Munisípiu no Unidade sira hotu bele hala’o aktividade patroillamentu atu prevene krime no problema sira ne’ebé akontese iha Territoriu Timor-Leste, tanba ne’e PNTL sei garante seguransa maximu iha ambitu selebrasaun natal no tinan foun.” Dehan Komisariu Jerál Polisia Henrique da Costa
Komisariu Jerál Polisia hatutan, sura de’it ona loron atu tama selebrasaun natal no tinan foun, tanba ne’e igreja sira, dadaun ne’e iha ona planu operasaun hodi koloka PNTL atu asegura seguransa.
“Ida diretiva PNTL ho F-FDTL, ita forma ona tarefa konjunta forsa rua sei kompleta malu halo patroillamentu ba prevensaun no halo atuasaun ba krime ruma karik akontese iha selebrasaun natal no tinan foun iha Timor-Leste.” Hatutan Komisariu Jeral Polisia
Komisariu Jerál informa, durante selebrasaun natal no tinan foun, iha diretiva operasaun konjunta PNTL ho F-FDTL bandu sidadaun sira hemu tua iha dalan publiku, tanba ne’e sidadaun sira ne’ebé hakarak festeza natal ho tinan foun hemu tua bele ba hemu iha uma hodi evita problema.
“Ha’u nia apelu ba joven sira hotu hanesan Autoridade Seguransa hakarak hato’o ba povu tomak katak, seguransa ne’e iha ita hotu nia liman, laos Polisia ho Forsa mak resposabiza mesak, maibé ita hotu nia kontribuisaun garante estabilidade ho hakmatek.” Informa Komisariu Jerál
Esplika liután, selebrasaun natal no tinan foun iha Territoriu Timor-Leste tenke iha situasaun di’ak no hakmatek, nune’e hotu-hotu tenke kria paz no estabilidade. Iha momentu ne’e mós hakarak aproveita hodi lori naran PNTL hakarak hato’o Baos Festas Santu natal no Boas Estradas Tinan 2026 ba sidadaun hotu iha Timor-Leste.
Reportajen : Nelfiano
Foto : Media PNTL