Dili, 04 Abril 2025 (Média Democracia) – Komandante Jerál Polisia Nasional Timor-Leste (PNTL) ba kumprimenta komunidade musulmanu relasiona ho selebrasaun loron idul-fitri ne’ebé foin dadauk ne’e, atividade vizita ne’e iha An-Nur Dili kinta semana ne’e
Komisariu Jerál Polisia Nasional Timor-Leste (PNTL) Henrique da Costa hateten, foin loron hirak liubá ba kotuk komunidade musulmanu iha mundu tomak hala’o selebrasaun ba loron Idul-Fitri mesmu la marka prezensa maibé biban ida ohin bele hasoru malu.
“Ohin hanesan loron importante ida mai ami hodi vizita komunidade musumanu liu-liu ba fundasaun An-Nur no estrutura tomak ne’ebé hamahon-aan iha musulmanu Timor-Leste relasiona selebrasaun loron Idul-Fitri foin dadauk, vizita ida ne’e laos foin ohin maibé kada tinan ami sempre mai vizita.” Dehan Komisariu Jerál Polisia Nasional Timor-Leste (PNTL) Henrique da Costa
Nia hatutan husu ba prezidente fundasaun An-Nur no estrutura tomak iha Timor-Leste nune’e ba futuru nafatin halo komunikasaun di’ak ho parte seguransa nian.
“Ami husu ba prezidente fundasaun An-Nur ho nia ekipa tomak atu nune’e halo komunikasaun ho parte seguransa nian karik iha asuntu ruma bele kontaktu ami atu nune’e bele atende. Ami mós hakarak hato’o agradese ba eskola An-Nur oan sira foin dadauk ne’e partisipa marsa koreunidas kompetisaun no atividade desportu futsal nian ba komemora loron Polisia Nasional Timor-Leste ba dala XX.” Dehan nia
Nia afirma hato’o mós programa komandu nian ida hanesan polisia vizita ba eskola no universidade nune’e ohin koalia ho prezidente fundasaun An-Nur katak iha tempu badak ekipa polisia komunitaria, tranjitu no investigasaun sei mai hasoru malu, nune’e bele realiza programa polisia vizita eskola ninian.
“Ita hanesan autoridade seguransa ita tenke tau-matan ba sidadun hotu-hotu. Ita la haree kona-ba kondisaun ka relijiaun saida de’it inklui estranjeiru sira ne’ebé daudaun hela iha Timor-Leste tenke responsabilidade tanba ita hanesan seguransa ba nasaun.” Nia haktuir
Nia informa seguransa ema hotu nian maibé ho numeru polisia nian ne’ebé sei menus ne’eduni husu ba komunidade musulmanu sira partikularmente bele kontribui mós pás no esbalidade harmonia iha Timor-Leste.
Iha fatin hanesan Prezidente Konesellu Fundasaun An-Nur, Abdullah Said Sargaran hateten, agradese tebes ba Komandante Jerál mai vizita diretamente iha komunidade musulmanu hatudu katak PNTL iha intensaun ne’ebé di’ak tebes hanesan seguransa nasaun nian.
“Ohin ami koalia kona-ba komunidade musulmanu halo nia jejun durante iha loron 30 nia laran iha momentu ida ne’e atu hasa’e fiar hodi halo mudansa espiritual. Iha momentu idul-fitri ami mós hetan mensajen ida husi amu Papa Francisco iha Roma mai komunidade musulmanu iha Timor-Leste, tanba loron idul-fitri ida ne’e ho loron kuarezma katolika nian.” Dehan Prezidente Konesellu Fundasaun An-Nur, Abdullah Said Sargaran
Nia hatutan loron idul-fitri no kuarezma iha fulan ne’ebé hanesan, nune’e bele hetan klamar ne’ebé mós espesialmente iha vida komun hatene katak tenke moris hamutuk tanba Amu Papa no Iman Alansar halo ona akordu kona-ba fraternidade umana.
Esplika liután Komandante Jeral halo vizita ba komunidade musulmanu ne’e hatudu katak atu kria pás no establidade harmonia iha Timor-Leste, nune’e labele hamosu konflitu entre relijiuju iha rai laran tanba ita hotu mesak kriatura maromak nian.
Reportajen : Nelfiano
Foto : Nelfiano