Dili, 02 Outubru 2025 (Média Democracia) – Estudante akadémikas no povo doben Turiacai no Maubisse realiza Komunikadu Imprensa ida ne’e, bazea ba preokupasaun kona-ba prelijetu rehabilitasaun estrada diresaun Urahou no Turiscai osan tokon tolu ho distansia 23 KM kontratu ba tinan ida maibé to’o dadaun laiha progresu. Konferensia ne’e hala’o iha Jardim 5 de Maio.
Porta-vóz Ivon Baisarek, iha konferensia hateten, estudante Universitariu Postu Turiscai no Maubisse dadaun hala’o hela estudu iha Dili no sira iha intesaun hodi realiza komunikadu emprensa bazieia ba preokupasaun povu Turiscai no Maubisse nian ba projeitu rehabilitasaun Estrada diresaun Uruhou Turiscai ne’ebé halo lansamento iha loron 13 fulan Juñu 2024 ho osan tokon tolu-resin ho distansia 23 KM. Komprimisu kontratru ba tinan ida ne’e lolos finalize/termina iha loron 13 Juñu 2025 nu’udar data ikus, maibé dadaun ne’e laiha progresu ruma ne’ebé lao tuir kontratu.
“Informasaun hirak ne’ebé fó sai iha media ba Publiku iha loron 08/07/2025, pagina Miniteriu Obras Publika katak, Estrada ligasaun Ainaro ba posto Administrativo Turiscai nia progresu konstrusaun atinji ona 54% no iha loron 08/09/2025, Ministeriu Obras Publika, apela ba publiku katak, Estrada ligasaun Uruhou Turiscai ho KM 12 foin atinji 30%. Iha loron 22/09/2025 Rakom Lian Proklamador halo intervista ho Eng. Elisio Francisco F. Belo, fó sai ba public katak, Estrada Urahou ba Turiskai KM 2 ne’e Atinji ona 64, 10%. Iha loron 23 Jullu 2025 Jornalista husi GMN halo intervita ba Ministeriu Obras Publik (MOP) katak Kontrusaun Estrada Maubisse ba Turiscal lao tarde, tanba kondisaun klima.” Dehan porta-vóz, Ivon Baisarek
Porta-voz hatutan, informasaun hirak ne’e hotu lori duvida ba povo Turiscai liu-liu realidade kondisaun Estrada ne’ebé komunidade Turiscai asesu sei difikulta tebes iha tempu udan monu rai nomos konstrusaun Estrada refere ho tipu ateru ka suru rai taka kuak la garantia kualidade hodi rejisti iha tempu udan nomos ba tinan barak nia laran sei difikulta ba transporte publiku no privadu ne’ebé halo movimetasaun iha tempu udan.
“Ami haree katak kompaña MONTANHA DIAK ne’ebé kaer projeitu konstrusaun Estrada refere la hatudu seriedade ka lao lentu nune’e difikulta tebes ba movimentu komunidade nian tanba ne’e ami juventude no komunidade husi Postu-Administrativu Turiscai Munisípiu Manufahi husu ba Direitor Adjunto e Diretor Exekutivu Interinu AND I.P, atu fó atensaun ba kompaña MONTANHA DIAK, tenke aselera prosesu Estrada entre ligasaun Maubisse no Turiscai, tanba tinan ida liu ona seidauk remata.” Hatutan Dehan porta-vóz
Porta-voz informa, lamenta tebes, tanba lansamentu iha loron 13/06/2024 ho osan resin ($3,270,571.41) ho distansia Estrada 23 KM maibé RACOM halo intervista iha loron 22/09/2025 ho Eng. Montanha di’ak hateten 2 KM de’it, ida ne’e hanesan bosok malorek povu Turiscai. Ho informasaun sira ne’ebé lansa iha media no intervista sira, tanba ne’e konsidera hanesan bosok povu atu nafatin dada to’o kampaña atu uza nu’udar materia kampana ba bosok nafatin povu hodi fó konfiansa
“Ami nafatin defende estrada Maubisse liga ba Turiscai nu’udar dalan protukolu hodi dignifika Dr. Franscisco Xavier do Amaral ba obra ne’ebé kontribui ba povu no nasaun ne’e bazeia ba proposta ne’ebé propoin ba Governu, obrigasaun tenke konsideira mós Turiscai parte husi historia luta ba independensia, infelizmente iha rezultadu, haree husi norma Prespektiva Publika nota katak prosesu kontinua realidade atraza signifika kompaña refere laiha kapasidade finanaseiru no material, Jeografikamente Turiscai Munisipiu Manufahi, reflete ba origen lolos husi Turiscai mak Dr. Franscisco Xavier do Amaral merese estadu tenke tau importantansia atu organiza ba dezenvolvementu.” Informa porta-vóz, Ivon Baisarek
Nia afirma, Estudante Universitariu Turiscai no Maubisse dadaun hala’o estudu iha Dili sai nu’udar matan no ibun ba sosiedade hodi husu ba governo da-sia liuhusi Ministru Obras Publiku (MOP) atu komuika kompaña Montana Diak tenke aselere lalais projetu konstrusaun, tanba postu Maubise no Turiscai, bazeia ba kondisaun estrada refere sai fenomena publiku ba sosiedade, liu-liu ba Suku sanulu resin-ida mak ejiste iha postu Turiscai. Iha Maubisse hanesan Suku Manelobas, Manetu, Maulau no Edi. Povu iha direitu atu husu komapaña seluk ne’ebé iha kapasidade ba kualidade no seriu atu bele kaer projetu refere.
Esplika liután husu ba inan aman, Veteranos, Sosiedade sivil joven no estudante sira atu hamrik junta forsa hodi eziji ba Governu liuhusi Ministeriu Obras Publik atu lalais responde ba povu nia preokupasaun sira liga ba konstrusaun Estrada ligasaun Maubisse Turiscai atu hafasil liu movimentasaun sira no fasilita atu transporta produto ba iha merkadu.
Reportajen : Nelfiano
Foto : Nelfiano