Dili, 11 Dezembru 2025 (Média Democracia) – Prezidente Republika Timor-Leste realiza komunikadu imprénsa hodi entrega Prémiu Direitus Umanus Sérgio Vieira de Mello Edisaun ba dala-18 ba iha Vensedor na’in neen.
Prezidente Republika, Laureadu Nobel ba Pás, José Ramos-Horta, entrega Prémiu Direitus Umanus Sérgio Vieira de Mello Edisaun ba dala-18 ba distintu vensedor na’in neen, iha Palásiu Prezidensiál Nicolau Lobato kuarta semana ne’e.
“Prémiu Direitus Umanus Sérgio Vieira de Mello nu’udar inisiativa ne’ebé lansa iha tinan 2008 husi Prezidente Repúblika objetivu atu rekoñese kontribuisaun husi sidadaun Timoroan, sidadaun estranjeiru, organizasaun governamentál ka naun-governamentál hotu, ba prosesu promosaun, protesaun no defeza direitus umanus iha Timor-Leste.” Dehan Prezidente Republika, José Ramos Horta
Prezidenta hatutan, prémiu ida-ne’e fó tinan-tinan husi Prezidente Repúblika iha loron 10 fulan-Dezembru, data adosaun Deklarasaun Universál Direitus Umanus husi Asembleia Jerál Nasoins Unidas, nu’udar Loron Internasionál Direitus Umanus nian.
“Prémiu ne’e fó iha kategoria rua ne’ebé diferente, Iha Direitu Sivíl no Polítiku, ne’ebé fó ba indivídu no organizasaun sira ne’ebé fó kontribuisaun notável ba promosaun no protesaun direitu sivíl no polítiku iha nasaun. Iha Direitu Ekonómiku, Sosiál no Kulturál, atribui ba sira ne’ebé fó ona kontribuisaun signifikativu ba promosaun no defeza Direitu Ekonómiku, Sosiál no Kulturál. Vensedor sira ne’e hili tuir prosesu avaliasaun ida-ne’ebé rigorozu husi Konsellu Onra, ne’ebé halo analiza ba aplikasaun sira no hala’o vizita verifikasaun iha fatin ba kandidatura sira ne’ebé tama ona iha lista badak.” Hatutan Prezidente Republika
Prémiu ne’e fó tuir Dekretu Prezidente Republika Nu. 129/2025, pessoal no organizasaun tuir mai ne’e simu Prémiu Direitus Umanus “Sérgio Vieira de Mello” ba Edisaun da-18, Kategoria I: Direitu Sivíl no Polítiku 1. Isabel Antónia da Costa Galhos 2. Me. Leonie Manalu, FCJM 3. Julião Cardoso. Kategoria II: Direitu Ekonómiku, Sosiál, no Kulturál 1. Kooperativa Comsoi 2. Grupo Monocura 3. Assosiasaun Esperansa Feto Difisiénsia.
“Iha aniversáriu Deklarasaun Universál Direitus Umanus, hanesan onra ba ita atu rekoñese pessoal sira ne’ebé aten-barani no organizasaun sira ne’ebé dedikadu.” Haktuir Prezidente José Ramos Horta
Prezidente afirma, sira-nia kompromisu metin ba justisa, dignidade no igualdade mak fundamentu ba demokrasia nasaun nian no esperansa ba ita-nia futuru. Sira reprezenta duni espíritu Sérgio Vieira de Mello, ne’ebé ninia legadu kontinua inspira ita-nia esforsu koletivu ba Timor-Leste ida ne’ebé justu liu.
Esplika liután Prezidente Republika entrega Prémiu Direitus Umanus ba vensedor na’in neen, bazea ba Dekretu-Lei No. 15/2009 loron 18 fulan-Marsu, vensedor ida-idak simu sertifikadu no prémiu osan hamutuk USD $10,000.
Reportajen : Nelfiano
Foto : Media PR