Dili, 27 Maiu, 2025 (Média Democracia) – Iha komunikadu ne’ebé hato’o husi Prezidente Republika Jose Ramos-Horta, fó indultu ba sidadaun na’in neen nu’udar aktu kleménsia umanitária no unidade nasionál.
Tuir Dekretu Prezidente Republika No. 45/2025, asina husi Prezidente Jose Ramos-Horta iha Palásiu Prezidensiál Nicolau Lobato iha Dili no publika iha Jornál Repúblika iha loron 26 Maiu 2025.
Sidadaun sira ne’ebé hetan indultu sira-ne’e hanesan:
- Honoria Pereira Lopes
- Norberto Barreto João
- Maria Goreti Abi
- Maria Scolastica Sona
- Julieta Godinho do Nascimento
- Armanda Jesus das Neves
“Indultu hirak-ne’e reflete ita-nia nasaun nia kompromisu ba justisa ho misericórdia no ita-nia fiar ba ema hotu-hotu nia dignidade fundamental. Maski ita tenke tane-aas estadu direitu, ita mós tenke rekoñese katak justisa loloos dalaruma presiza aktu klemensia ne’ebé serve ba objetivu umanitáriu no promove reintegrasaun sosiál.” Dehan Prezidente Republika Jose Ramos-Horta
Desizaun hirak-ne’e hametin espíritu unidade nasionál ne’ebé tenke orienta ita bainhira ita harii futuru ida-ne’ebé prosperu liubá povu Timor-Leste tomak.
Prezidente Republika Jose Ramos Horta afirma Desizaun ne’e reflete konsiderasaun kuidadozu ba ema ida-idak nia sirkunstánsia pesoál, umanu, família, no sosiál, nomos sira-nia potensial ba reintegrasaun sosiál.
PR reafirma perdaun Prezidensál sira-ne’e konstitui intervensaun polítika no umanitária iha administrasaun justisa, hodi permite aktu ekuidade individuál tuir lei konstitusionál.
Reportajen : Domingas
Foto : Media Officer PR