Dili, 19 Juñu 2025 (Média Democracia) – Prezidente Repúblika José Ramos-Horta akompañadu husi delegasaun ofisiál ida to’o iha Aeroportu Internasionál Kuala Lumpur, iha tuku 16:30 loraik. Bainhira to’o ekipa simu diretamente husi Embaixadór Timor-Leste ba Malázia, Lisualdo Gaspar, hafoin tuir kedas ho delegasaun sira diretamente ba Hotél St. Regis Kuala Lumpur.
Xefe Estadu partisipa iha fórum internacional Global Leadership no Dialogue Initiative (GLDI), ne’ebé akontese iha kapitál Malázia nian. Partisipasaun Prezidente Ramos-Horta nian iha fórum ne’e reprezenta kompromisu kontinuasaun ho promosaun ba pás, justisa sosiál no étika lideransa nian iha nivel mundiál.
Prezidente Ramos-Horta sai oradór prinsipál, ne’ebé sei koa’lia kona-ba esperiénsia husi Timor-Leste nian no perspetiva ba lideransa humanista no diálogu internasionál konstrutivu.
Eventu ne’e inklui mós lansamentu ba livru “Anwar Ibrahim” Justisa Globál no Dame liuhusi Diálogu “Yusmadi Yusoff, ne’ebé hanesan mós Prezidente ba Fundasaun RIGHTS. Sesaun ne’e konta ho partisipasaun husi figura públiku no polítiku proeminente sira, inklui Dato’ Seri Dr. Wan Azizah Wan Ismail, Eis-Vise Primeiru Ministru Malázia nian, atuál Membru Parlamentu Malázia nian no kaben husi Primeiru Ministru Malázia nian.
Programa ne’e inklui mós Jantar ofisiál Konfraternizasaun hó Primeiru Ministru Malázia, Dato Seri Anwar Ibrahim. Malázia nu’udar Parseiru estratéjiku iha kontestu ASEAN nian no apoiante ida ba tempu naruk iha perkursu dezenvolvimentu Timor-Leste nian.
Reportajen : Asesu husi Media PR
Foto : Media PR