Dili, 16 Setembru 2025 (Média Democracia) – Prezidente Republika José Ramos-Horta, ofisialmente simu karta Kredensiál husi Sua Exelensia Sr. Thorsten Bargfrede, Embaixadór Foun Uniaun Europeia nian mai Repúblika Demokrátika Timor-Leste, serimónia ida ne’e hala’o iha Palásiu Prezidensiál Nicolau Lobato.
Relasaun diplomátika entre Timor-Leste no Uniaun Europeia, ne’ebé harii iha loron 20 fulan-maiu tinan 2002, iha abut kle’an iha parseria ida ne’ebé kleur ona bazeia ba valór sira ne’ebé fahe ba malu kona-ba demokrasia, direitus umanus, no estadu direitu.
UE nu’udar parseiru dezenvolvimentu dahuluk ne’ebé fó apoiu ba Timor-Leste, defende prinsípiu “Nasaun Rasik mak na’in, Nasaun rasik mak Lidera, no Uza Sistema Nasaun nian rasik.” Kooperasaun atuál foka ba diversifikasaun no kresimentu ekonómiku, boa governasaun, dezenvolvimentu verde no sustentável, inkluzaun sosiál, no integrasaun rejionál, notavelmente liuhusi apoiu ba Timor-Leste nia adezaun ba ASEAN no Organizasaun Mundiál Komérsiu.
Embaixadór foun, Sr. Thorsten Bargfrede, nu’udar diplomata ida ne’ebé iha esperiénsia ho kareira distintu iha Servisu Asaun Esterna Europeu nian. Nia lori esperiénsia barak husi kargu xave sira iha Sri Lanka, Maldivas, Kénya, Pakistaun, no Bruxelas, ho foku ba asuntu polítiku sira, planeamentu estratéjiku, no kooperasaun dezenvolvimentu.
Prezidente Ramos espresa ninia konfiansa katak Embaixadór nia esperiénsia diplomátika ne’ebé extensivu sei kontribui signifikativamente ba aprofundamentu ligasaun bilaterál sira.
“Uniaun Europeia sai hanesan parseiru ida ne’ebé metin dezde momentu sira uluk liu iha ita-nia nasaun nia renasimentu. Ita-nia parseria, ne’ebé baseia ba respeitu mútuu no valór sira ne’ebé fahe ba malu, kontinua fó kbiit ba ita-nia instituisaun no ita-nia povu.” Dehan Prezidente Republika José Ramos-Horta
Prezidente hatutan, Apoiu husi UE nian fundamental tebes ba Timor-Leste nia luta ba reziliénsia ekonómika, integrasaun rejionál, no futuru sustentável ba Timor-oan sira hotu. Timor Leste hein atu servisu hamutuk ho Embaixadór Bargfrede hodi hametin liután aliansa importante ida-ne’e.
Prezidente Ramos-Horta rekoñese projetu oioin ne’ebé hala’o hela no hetan apoiu husi Ekipa Europa no dezeja ba Embaixadór Bargfrede mandatu ida ne’ebé susesu no produtivu iha Timor-Leste.
Reportajen : Domingas
Foto : Media Officer PR