Dili, 8 Jullu 2025 (Média Democracia) – Prezidente Republika José Ramos-Horta, espresa ninia sentimentu tristeza profunda hafoin inundasaun devastadora ne’ebé akontese iha Texas Sentrál, hodi rezulta sidadaun balun lakon vida signifikativu no família sira barak tenke husik sira-nia uma.
Inundasaun trájiku ne’e halakon ona ema na’in 82 nia vida, ho ema liu na’in 40 ne’ebé seidauk hetan no família rihun resin maka afetadu husi dezastre ne’e. Ekipa sira resposta emerjénsia nian, voluntáriu sira, no traballadór sira salvamentu nian kontinua sira-nia esforsu, sira ne’ebé la hatene kole hodi lokaliza sobrevivente sira no fornese asisténsia ba komunidade sira ne’ebé afetadu.
Iha karta ofisiál ba Prezidente Estadus Unidus Amérika, Sua Exelénsia Donald Trump, iha loron 7 fulan-jullu tinan 2025, Prezidente Ramos-Horta espresa povu Timor-Leste nia solidariedade ho povu Amerikanu sira iha tempu difísil ida-ne’e. Prezidente rekoñese esforsu estraordináriu husi ekipa salvamentu no voluntáriu sira ne’ebé kontinua servisu ho korajen no dedikasaun atu salva moris no ajuda sira ne’ebé presiza.
“Iha momentu ida moras no sofrimentu ne’e, ha’u hakarak hato’o ba Vossa Exelénsia, família enlutada, no ba povu Estadus Unidus Amérika, ha’u-nia solidariedade no kondolénsia sinseru.” Prezidente Ramos-Horta afirma.
Timor-Leste akompaña, ho laran-susar no esperansa, esforsu estraordináriu husi ekipa salvamentu sira, voluntáriu sira, no sira hotu ne’ebé, ho aten-barani no dedikasaun, kontinua serbisu maka’as hodi salva sobrevivente sira no tulun komunidade sira ne’ebé afetadu.
“Ami reza ba vítima sira husi katástrofe ida-ne’e no ba família sira hotu ne’ebé aguenta tempu susar hanesan ne’e, hein katak sira bele hetan konfortu iha unidade husi ita-boot nia povu no iha espíritu kompaixaun no reziliénsia ne’ebé sempre karakteriza Estadus Unidus Amérika.” Hatutan PR Ramos-Horta
Prezidente Ramos- subliña katak Timor-Leste hamriik iha solidariedade ho Estadus Unidus durante tempu trajédia ida-ne’e, reflete lasu amizade ne’ebé metin no respeitu ba malu entre nasaun rua ne’e.
Reportajen : Domingas
Foto : Media Officer PR