Dili, 25 Outubru 2025 (Media Democracia) – Prezidente Republika José Ramos-Horta, aranka ba vizita ofisiál ida iha Kuala Lumpur hodi partisipa iha serimónia adezaun formál Timor-Leste nian nu’udar Estadu Membru ba dala-11 Asosiasaun Nasaun Sudeste Aziátiku (ASEAN) nian, komunikadu ne’e hala’o iha Sexta semana ne’e
Prezidente da Republika José Ramos Horta, dehan Simeira ASEAN ba dala-47 no simeira sira Relevante sei hala’o iha Kuala Lumpur, Malázia, husi loron 26 to’o 28 Fulan-Outubru 2025. Ho tema “Inkluzividade no Sustentabilidade”.
“Simeira ne’e sei halibur Xefe Estadu no Governu na’in-30 resin, inklui Prezidente EUA, Donald Trump, Primeiru-Ministru Xina, Li Qiang, Prezidente Brazíl, Luiz Inácio Lula da Silva, Prezidente Áfrika Súl, Cyril Ramaphosa, no Primeiru-Ministru Índia, Narendra Modi. Iha loron 26 fulan-outubru, Prezidente Ramos-Horta sei sai sasin ba momentu istóriku importante ida ne’e ba nasaun iha Sentru Konvensaun Kuala Lumpur.” Dehan Prezidente da Republika José Ramos Horta
Prezidente da Republika hatutan asinatura deklarasaun kona-ba Admissaun Timor-Leste nian ba ASEAN reprezenta kulminasaun husi preparasaun institusionál, diplomátika no téknika durante dékada rua nia laran ba integrasaun totál iha komunidade rejionál.
“Ami-nia prezensa iha Simeira ASEAN ida-ne’e nu’udar testamentu ba kompromisu metin Timor-Leste nian ba ami-nia destinu nu’udar membru totál família Sudeste Aziátiku nian. Ita la’ós de’it hametin ita-nia pozisaun iha rejiaun, maibé mós harii ponte ho parseiru globál xave sira. Timor-Leste hateke ba oin no prontu atu kontribui ba pás, estabilidade no prosperidade komún iha rejiaun.” Haktuir Prezidente da Republika
PR afirma iha loron 27 Fulan-Outubru, Prezidente Ramos-Horta sei hala’o enkontru bilaterál estratéjiku oioin, inklui diskusaun ho Sekretáriu Estadu EUA, Mark Rubio no ninia delegasaun. Iha kalan, Prezidente sei partisipa iha jantar ida ne’ebé oferese husi Primeiru-Ministru Malázia nian, Sua Exelénsia Dato’ Seri Anwar Ibrahim. No Iha loron 27 fulan-outubru, Prezidente Ramos-Horta sei hasoru malu ho Prezidente Konsellu Europeu, Sua Exelénsia António Costa.
“Ramos-Horta sei remata ninia vizita ofisiál ba Malázia iha ninia kapasidade nu’udar Profesór Adhuntu Onoráriu, hodi hato’o palestra prinsipál ida ba estudante sira no ba Eskola Direitu no Governasaun iha Universidade Taylor’s.” Hatete PR
Esplika liután Prezidente da Republikavizita ida-ne’e hanesan dedikasaun metin Prezidente Horta nian atu promove interese estratéjiku Timor-Leste nian iha nível mundiál no hametin lasu sira ne’ebé forte liután ho parseiru rejionál no internasionál sira.
Reportajen : Domingas
Foto : Media Prezidente da Republika