Lisboa, 16 Jullu 2025 (Média Democracia) – Prezidente Republika José Ramos-Horta, hahu viajen ba Guiné-Bissau hodi partisipa iha XV Konferénsia ba Xefe Estadu no Governu Komunidade País sira Lian Portugés (CPLP) nian. Informasaun hirak ne’e Media Democracia asesu liuhusi Via-Whatsapp.
Simeira ne’ebé hala’o iha prezidénsia Sua Exelénsia Jenerál Umaro Sissoco Embaló, Prezidente Repúblika Guiné-Bissau, marka aniversáriu CPLP nian ba dala 29 ho sentru iha tema “CPLP no Soberania Alimentár, Dalan ida ba Dezenvolvimentu Sustentável”. Líder sira CPLP nian sei diskute dezafiu urjente sira, inklui kooperasaun rejionál, seguransa alimentár, no reziliénsia ekonómika.
Prezidente Ramos-Horta sei partila Timor-Leste nia kompromisu ba multilateralizmu, hodi afirma, Soberania alimentár la’ós de’it imperativu ekonómiku ida maibé morál ida. Nu’udar komunidade ida ne’ebé kesi ho lian no istória hanesan, CPLP tenke defende agrikultura sustentável, fó kbiit ba agrikultór ki’ik sira, no asegura katak laiha Estadu membru ida mak husik hela iha kotuk iha ita-nia hakarak hodi atinji ba dezenvolvimentu ekuitativu.
Rezultadu prinsipál sira husi Simeira ne’e inklui, Adosaun Deklarasaun Bissau, reforsa kompromisu CPLP nian ba soberania alimentár no reziliénsia klimátika Eleisaun Guiné-Bissau nu’udar Prezidente Pro Tempore CPLP nian (2025-2027), Aprezentasaun Prémiu “José Aparecido de Oliveira” ba distintu xefe sira, inklui Eis-Prezidente Mosambikanu Joaquim Chissano.
Prezidente mós sei hala’o enkontru bilaterál sira, hodi hametin Timor-Leste nia parseria sira iha komérsiu, edukasaun, no sustentabilidade ambientál iha mundu luzófonu. Prezidente Ramos-Horta sei konklui nia vizita iha Guiné-Bissau iha loron 19 fulan-jullu tinan 2025.
Reportajen : Media PR
Foto : Media Officer PR