Dili, 09 Janeiru 2026 (Média Democracia) – Prezidente Repúblika Timor-Leste realiza komunikadu imprénsa hodi sai uma-nain ba konsertu pianu no orkestra ne’ebé furak iha Palásiu Prezidensiál Nicolau Lobato. Iha eventu ne’e selebra nasaun nia talentu muzikál foin-sa’e sira-nian ne’ebé estraordináriu no destaka futuru promisór husi paizajen kulturál Timor-Leste nian. Atividade refere Média Democracia asesu husi pajina PR Sexta seman ne’e.
Prezidente Repúblika José Ramos Horta hateten iha komunikadu katak, konsertu ne’e konta ho atuasaun notável husi joven pianista Solomon Bravery Hasudungan Horta no Teshan Singh Sidhu, hamutuk ho Orkestra Juvenil Dom Bosco Baucau no Orkestra Berliku Fanu Rai (BFR).
“Solomon Bravery Hasudungan Horta (moris iha 10 Agostu 2014) mak artista ida multitalentoza ne’ebé buras daudaun, husi axendénsia Timorense no Indonézia nian. Pianista ida ne’ebé ho talentu, nia manán ona prémiu oioin iha primeiru-lugar no “Pianista ne’ebé Promisór Liu” festivál sira iha Irlanda Norte. Ninia talentu sira habelar ba oatória no drama, iha ne’ebé nia hetan onra importante sira no projesaun partisipasaun iha filme sira BBC Teach nian no papél prinsipál iha filme badak Natal Disney+ nian “The Boy and the Octopus,” ne’ebé diriji husi Taika Waititi.” Dehan Prezidente Repúblika José Ramos Horta iha Komunikadu
Prezidente hatutan, iha kumunikadu Teshan Singh Sidhu (tinan 11), oan husi Embaixadór Malázia nian iha Timor-Leste, S.E. Dato’ Amarjit Singh Sarjit Singh. Nia hahú nia estudu pianu iha fulan tolu liubá, foufoun aprende iha tekladu. Maski ninia períodu formasaun badak, nia hatudu interese, dedikasaun no entuziazmu ne’ebé notavel ba konsertu ida-ne’e, nia aprezenta konjuntu husi pesa badak haat, introdusaun ne’ebé inspira husi melodia tradisionál no universalmente rekoñesida, hodi oferese ba públiku interlúdiu muzikál ida ne’ebé asesivel no enkantadór.
“Orkestra Juvenil Dom Bosco Baucau hetan rekoñesimentu nu’udar Embaixadora ba jerasaun muzikál foun, aprezenta repertóriu oioin ne’ebé simboliza renovasaun no futuru múzika iha Timor-Leste. Harii iha tinan 2021 ho diresaun husi Maestro Padre Adérito Manuel Costa, orkestra ne’e fó formasaun muzikál ne’ebé sólida ba talentu joven sira iha Eskola Múzika Dom Bosco Baucau. Esemble ne’e koñesidu ba ninia kapasidade atu interpreta tantu repertóriu klásiku nomos pesa kontemporánea sira, hodi desempeña papél signifikativu ida hodi promove múzika no kultura entre foin-sa’e Timor-oan sira.” Hatutan Prezidente Repúblika
Prezidente informa, iha komunikadu Orkestra Berliku Fanu Rai (BFR) nu’udar asosiasaun múzikal Timor-oan ne’ebé harii iha tinan 2009 husi Sr. Kiera Zen no formalmente rekoñese husi Ministériu Justisa iha tinan 2010. Asosiasaun ne’e desempeña papél fundamentál ida hodi promove múzika tradisionál no kontemporánea hanesan veíkulu ba espresaun kulturál, kapasitasaun juvenil no envolvimentu komunitáriu. Ninia atividade sira inklui operasaun estúdiu gravasaun profisionál ida, oferta formasaun iha produsaun muzikal no enjeñaria son nian, no organizaun konsertu, festivál no programa edukativu sira.
“Konsertu ne’e mistura melodia internasionál sira ne’ebé furak ho múzika tradisionál Timor-Leste nian, hodi reflete nasaun nia tapeçaria kulturál ne’ebé vibrante. Parte I konta ho atuasaun dinámika husi Orkestra Juvenil Dom Bosco Baucau, selesaun ida ba Teshan Singh Sidhu nian no repertóriu festivál ida husi Orkestra Berliku Fanu Rai (BFR).” Informa Prezidente Repúblika iha Komunikadu
Iha Parte II husi konsertu konta ho abilidade pianu klásiku husi Solomon Horta, inklui ninia diskursu inspiradór rua, “This is Who You Are” no “The Hill We Climb,” no projesaun filme badak Disney+ nian “The Boy and the Octopus,” ne’ebé diriji husi realizadór famozu Nova Zelándia nian Taika Waititi no Solomon Horta mak sai protagonista.
“Múzika mak linguajen universál ba pás no ba uniaun nian. Iha armonia husi piano no orkestra nian, ita rona ita-nia nasaun nia futuru nia lian, futuru ida ne’ebé harii iha ita-nia foin-sa’e sira-nia talentu, ita-nia kultura nia forsa no ritmu partilladu husi esperansa ne’ebé halo fuan tuku-tuku iha Timor-oan sira ida-idak.” Relata Prezidente Repúblika José Ramos Horta
Esplika liután konsertu ne’e destaka ho susesu profundidade ba diversidade talentu emerjente Timor-Leste nian, nune’e mós sai nu’udar plataforma ida ne’ebé maka’as ba interkámbiu kulturál no diálogu liuhusi linguajen universál múzika nian. Tuir mai ho entrega sertifikadu ba artista sira no koktél boazvindas ida.
Reportajen : Nelfiano
Foto : Media PR