Dili, 04 Fevereiru 2026 (Média Democracia) – Komunikadu Imprensa Prezidente no Laureadu Nobel ba Pás hala’o vizita privadu/traballu ba Abu Dhabi, Emiradu Árabe Unidu, husi loron 3 to’o loron 5 fulan fevereiru tinan 2026, hodi partisipa iha seremónia no forúm anual ba Premiú prestijiozu Zayed Fraternidade Umana 2026. Komunikadu refere Média Democracia asesu husi pajina PR kuarta semana ne’e
“Vizita ida-ne’e nu’udar testemuña kle’an ida ba ita-nia hakarak universál ba pás no respeitu ba malu. Timor-Leste nia adosaun pioneira ba dokumentu kona-ba Fraternidade Umana deklara ita-nia karakter nasionál. Partisipa iha diálogu globál ida-ne’e reforsa ita-nia devér atu defende kompaixaun no diálogu nu’udar pilar fundamentál ba mundu ida ne’ebé justu no dame liután.” Dehan Prezidente Republika José Ramos Horta iha komunikadu
Prezidente afirma, kompromisu nivel-aas ida ne’e Timor-Leste nia papél ativu iha diskursu umanitáriu globál no ninia kompromisu atu promove pás internasionál, solidariedade no komprensaun ba malu nomos hametin relasaun bilaterál ho Emiradus Arabes Unidas.
“Prémiu Zayed ba Fraternidade Umanu maka prémiu internasionál anuál ida ne’ebé fó onra ba ema no entidade sira ne’ebé servisu ho laran-luak hodi halo ponte ba divizaun sira no haburas ligasaun umana ne’ebé signifikativa, dala barak ho sakrifísiu pesoál ne’ebé boot.” Afirma Prezidente Republika iha komunikadu
Prezidente relata, defensór globál preminente ida ba fraternidade umana no eis-membru ida husi komisaun júri nia ba prémiu ne’e, hetan konvite atu ko’alia iha Majlis Fraternidade Umanu nian iha loron 3 fulan fevereiru. Iha sesaun abertura ho títulu “Resposta Umanitária iha Asaun, Lidera ho Korajen, Kompaixaun no Integridade,” iha Muzeu Nasionál Zayed Majlis konvoka líder no peritu distintu sira hodi diskute dezafiu globál sira no dalan ba pás.
Iha loron 3 fulan fevereiru, Prezidente sei hasoru malu ho futuru diplomata sira nu’udar oradór konvidadu iha Akademia Diplomátika Anwar Gargash (AGDA), no sei hasoru malu mós ho S.E. Mohamed Saif Al Suwaidi, Diretór Jerál ba Fundu Dezenvolvimentu Abu Dhabi nian, hodi diskute kona-ba parseria ba dezenvolvimentu.
Entertantu iha loron 4 fulan fevereiru, Prezidente Ramos-Horta sei halo vizita kortezia ba Sua Alteza Sheikh Mohamed bin Zayed Al Nahyan, Prezidente Emiradus Árabes Unidus. Tuir mai, Prezidente sei partisipa iha Serimónia Prémiu Zayed ba Fraternidade Umanu 2026 iha Memoriál Fundadór fatin istóriku ba asina Dokumentu kona-ba Fraternidade Umana iha tinan 2019. Timor-Leste halo istória iha tinan 2022 nu’udar nasaun dahuluk ne’ebé formalmente adopta Dokumentu ida-ne’e ba iha ninia valór nasionál sira.
Esplika liután Onradu ba Prémiu Zayed 2026 mak akordu istóriku kona-ba pás entre Arménia no Azerbaijaun, no defensór edukasaun ba labarik-feto Afghan nian, Zarqa Yaftali. Konklui ninia vizita iha loron 5 fulan-Fevereiru, Prezidente Ramos-Horta sei partisipa iha Simeira Governu Mundiál nian iha Dubai, hamutuk iha sesaun plenária ida kona-ba forma Governasaun iha futuru.
Reportajen : Nelfiano
Foto : Média PR