Dili, 8 Maiu 2025 (Média Democracia) – Tuir konvite husi Prezidente da Republika Jose Ramos-Horta, simu vizita ofisial husi Prezidente Senadu no Eis Primeiru Ministru Reinu Kamboja, Samdech Akka Moha Sena Padei Techo HUN SEN, halo vizita ofisiál mai Dili husi loron 7 to’o loron 9 fulan Maiu tinan 2025.
Prezidente Ramos-Horta hateten ho laran kmanek hato’o benvindu ba Samdech Akka Moha Sena Padei Techo HUN SEN iha Aeroportu Internasionál Nicolau Lobato. Ida ne’e marka Samdech Techo HUN SEN nia vizita daruak mai Timor-Leste, hafoin nia vizita ofisiál dahuluk iha tinan 2016 durante nia mandatu nu’udar Primeiru-Ministru Reinu Kamboja nian.
“Ho laran kmanek ha’u hato’o benvindu ba Samdech Akka Moha Sena Padei Techo HUN SEN, Prezidente Senadu no Eis Primeiru Ministru Reinu Kamboja nian, mai Timor-Leste ba vizita istóriku ida-ne’e, Prezensa Samdech Techo HUN SEN iha Timor-Leste la’ós de’it simboliza amizade entre ita-nia nasaun rua maibé mós loke kapítulu foun iha relasaun entre povu ho povu.” Afirma Prezidente Ramos-Horta
Vizita istóriku ida ne’e marka etapa signifikativu iha relasaun bilaterál entre Timor-Leste no Kamboja, hafoin estabelesimentu Embaixada Kamboja nian iha Dili no aprezentasaun kredensiál husi Embaixadór CHUN Sovannarith iha loron 29 Abril 2025.
Iha loron 8 fulan Maiu, Prezidente Ramos Horta sei hala’o enkontru bilaterál ho Samdech Akka Moha Sena Padei Techo HUN SEN, akompaña husi delegasaun altu nível husi nasaun rua nian, iha Palásiu Prezidensiál Nicolau Lobato.
Samdech Techo HUN SEN sei hato’o diskursu iha Parlamentu Nasionál no hala’o sorumutuk bilaterál ho Prezidente Parlamentu Nasionál, S.E. Maria Fernanda Lay, no Primeiru Ministru Kay Rala Xanana Gusmão.
“Iha kalan loron 8 fulan Maiu, Prezidente Ramos Horta sei ofrese bankete ofisiál hodi fó onra ba vizita ofisiál Samdech Akka Moha Sena Padei Techo HUN SEN nian.” Dehan Prezidente Ramos Horta
Iha loron 9 fulan Maiu, Prezidente Ramos Horta sei entrega Honra aas liu Orden Timor-Leste nian ba Samdech Techo HUN SEN iha Palestra Prezidensiál 2025 Série I, ne’ebé sei hala’o iha Palásiu Prezidensiál Nicolau Lobato, hafoin serimónia ne’e, Samdech Techo HUN SEN sei hato’o diskursu prinsipál ida ho títulu “HUN SEN nia Lisaun sira: Husi Jenosídiu no Pobreza ba Liberdade no Prosperidade.
Vizita Samdech Akka Moha Sena Padei Techo HUN SEN subliña profundamentu amizade entre Timor-Leste no Kamboja no reflete kompromisu komún nasaun rua nian ba kooperasaun no dezenvolvimentu rejionál iha kuadru ASEAN nian.
Reportajen : Domingas
Foto : Media Officer PR