Dili, 07 Marsu 2025 (Média Democracia) – Prezidente Ezekutivu Fundasaun Cristal Agostinho dos Santos Gonçalves, husu ba Estudante Fakuldade Siensia Saude Institutu Superior Cristal tinan akadémiku 2025 atu sai estudante ne’ebé badinas, iha kualidade prosesu ensinu aprendijazen, kualidade Umanizmu no espirituál atu nune’e bainhira sai Profesional Saúde tenke kuidadu pasiente ho sentimentu no domin.
Lia-hirak ne’e hato’o bainhira hola pozisaun iha Orientasaun Akadémika ba Estudante foun tinan 2025, Fakuldade Siénsia Saúde Institutu Superior Cristal (ISC) iha Kampu Futsal Instituição Edukativa Cristal-Fundação Cristal Balide, Kinta ne’e.
Prezidente ne’e hatutan katak departamentu ida-idak hala’o nia papél krusiál hodi dezenvolve koñesimentu no abilidade esensiál atu nune’e estudante sira bele hetan nesesidade saúde komunidade Timor-Leste nian ho kompeténsia no étika.
“Fakuldade Siensia Saude bazeia ba pillar esensial tolu ne’ebe orienta iha Edukasaun tomak, mak tenke umanizmu, espiritualidade, no kualidade iha prosesu ensinu no aprendijazem hotu-hotu, kuirikulu atualizadu ho Dosente sira ne’ebé formal no profesional tebes.” Nia dehan
Nia esplika katak husi umanidade ne’e hanorin katak atu kuidadu pasiente ho empatia, tanba ne’e uza profisaun tenke hatudu oin-hamnasa no atende pasiente ho laran no domin.
“Respeitu no dignidade, prepara estudante sira atu sai profesional ne’ebé komprende no valoriza ema nia moris, tanba ema nia moris importante noo espiritualidade ne’ebé sai baze ba ita-nia prinsipiu sarani sira, inspira ita-nia estudante sira atu tuir kristu nia hanorin iha sira-nia pratika loron-loron nian.” Nia esplika
Departamentu Enfermagen prepara estudante sira atu servisu ho siénsia iha kuidadu saúde primáriu, sekundáriu no tersiéra, permite sira sai ajente fundamental iha promosaun saude no kuidadu pasiente.
Departamentu Parteira forma profesional sira ne’ebé atu akompaña no tau-matan ba inan no bebe, sira mak kompetensia teknika no sensibilidade umanu hodi garante kuidadus saude ho kualidade ba jerasaun futuru Timor-Leste nian
Departamentu Fisioterapia treina estudante sira atu reabilita no prevene saude fisiku pasiente sira-nian, uza tekniku fisioterapia avansadu hodi hadia kualidade moris ba sira ne’ebé presija kuidadus espesializadus.
Iha fatin hanesan, Magnífiku Reitór Institutu Superior Cristal Sebastião Pereira haktuir, orientasaun ba Estudante foun, ne’e fó koñesimentu ba estudante, tanba sira tama iha ambiente foun iha área akadémika nian.
“Objetivu orientasaun maka, ita-boot sira atu hatene kona-ba estrutura sira iha Institutu Superior Kristal no Unidade sira hanesan, Instalasaoens sira ne’ebé iha, rekursu aprendijazem, Biblioteka, Laboratorium ne’ebé ita-boot sira atu uza durante iha prosesu ensinu aprendijazen. Ba biblioteka ita-boot sira sei aprende erabilidade Digital, Online, nomos ita-boot sira bele lee livru sira ne’ebé iha.” Haktuir Reitór ISC.
Nia husu ba estudante sira tenke aprende ho di’ak no uza fasilidade sira ne’ebé iha, tanba Institutu Superior Cristal iha laboratóriu ba Departamentu Enfermagen, Departamentu Parteira nomos Departamentu Fisioterapia nia ekipamentu kompletu, tan ne’e tenke aproveita oportunidade ho di’ak.
Iha biban ne’e Prezidente Komisaun Organizadora ba tinan Akadémiku 2025 Angelmo Alves de Araujo hateten, Objetivu husi atividade orientasaun refere atu estudante sira bele koñese kle’an kona-ba ambiente Institutu Superior Crista nomos sei iha etapa teste mentál nian, nune’e estudante foun bele hatene saida mak durante ne’e ISC kria iha fatin refere.
“Atividade realiza loron ida de’it no sei Ensera iha loraik maibé kontinuasaun ba aban nian sei halo direita husi Fakuldade hodi teste Saude mental ba estudante sira, atu nune’e sira brani oinsa bele hasoru Pasiente ne’ebé iha Ospital liu-liu mate isin.” Nia informa
Entretantu, Total estudante husi Fakuldade Siénsia Saúde ne’ebé partisipa iha orientasaun ne’e hamutuk 613, kompostu husi Departmentu tolu hanesan, Departmentu Enfermagem 295, Departamentu Parteira 296 no Departamentu Fisioterapia 22.
Reportajen : Estefania
Foto : Estefania