Dili, 21 Agostu 2025 (Média Democracia) – Prezidente Republika José Ramos Horta kondekora titlu póstumu ho Grau Kolar Orden Timor-Leste nian ba Kombatente Libertasaun Nasionál na’in Haat. Serimónia solene ne’e hala’o iha Tasi-Tolu kuarta feira semana ne’e.
Iha okaziaun istóriku aniversáriu Forças Armadas de Libertação Nacional de Timor-Leste (FALINTIL), ba dala 50, Prezidente Republika José Ramos-Horta, kondekora titlu póstumu ho onra aas liu nasaun nian ba Eroi Na’in Haat ne’ebé luta ba independénsia Timor-Leste nian.
Tuir Dekretu Prezidente Repúblika Nú. 82/2025, ne’ebé asina iha loron 19 fulan-agostu tinan 2025, iha Palásiu Prezidensiál Nicolau Lobato, Prezidente Ramos-Horta kondekora titlu póstumu ho Grande Kolar Orden Timor-Leste nian ba Matebian Prezidente Nicolau dos Reis Lobato “Tau Fui.
Aleinde ne’e, tuir Dekretu Prezidente Repúblika Nú. 83/2025, ne’ebé asin mós iha loron 19 fulan Agostu, Prezidente Ramos-Horta kondekora titlu póstumu ho Grau Kolar Orden Timor-Leste nian ba Kombatente Libertasaun Nasionál na’in tolu ne’ebé respeitadu:
- Joaquim Saldanha “Naha Berek”.
- Artur do Nascimento “Tripas”.
- Dulce Cruz “Wewe Sahe”
Prezidente Horta afirma, “Ohin, iha aniversáriu FALINTIL nian ba dala 50, ita fó onra ba mandatu konstitusionál hodi rekoñese lideransa supremu Prezidente Nicolau Lobato nian no korajen imensu husi eroi sira hanesan Joaquim Saldanha, Artur do Nascimento, no Dulce Cruz. sira-nia legadu mak livre no soberanu Timor-Leste ne’ebé ita moris iha ohin loron.
Serimónia ida-ne’e marka pasu signifikativu ida iha kompromisu Estadu nian hodi fó onra ba pesoal hotu-hotu ne’ebé dedika sira-nia moris ba independénsia Repúblika Demokrátika Timor-Leste.
Reportajen ; Domingas
Foto : Domingas