Dili, 20 Novembru 2025 (Média Democracia) – Ministeriu Edukasaun, akompaña husi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, asina memorandu entendimentu ho Institutu São João de Brito Liquiçá, iha sala VIP Ministériu Edukasauan, Vila-Verde. Atividades asina memorandu ne’e Média Democracia asesu husi pajina ME Kinta semana ne’e.
Ministra Edukasaun, Dulce de Jesus Soares iha diskursu hateten, ohin asina akordu entre Ministériu Edukasaun, INFORDEPE no Institutu São João de Brito (ISJB), hanesan akta ida atu simboliza determinasaun Governu nian hodi tau kualidade edukasaun no valorizasaun ba profisaun manorin-na’in sira-nian iha sentru prioridade Estadu.
“Ita sei kontinua investe iha formasaun sira hanesan, formasaun preparatória, formasaun espesializada no haforsa abilidade profisionál ba ita-nia mestre sira. Ita sei kontinua estabelese mós parseria estratéjika ho instituisaun exelente sira. Ami sei kontinua servisu, atu nune’e eskola ida-idak iha Suku, Postu-Administrativu no Munisípiu, iha profesór sira ne’ebé preparadu didi’ak, motivadu no rekoñese liuhusi sira-nia misaun.” Dehan Ministra Edukasaun Dulce de Jesus Soares
Ministra Edukasaun hatutan, laiha dezenvolvimentu nasionál ida-ne’ebé laho profesór sira ne’ebé forte, preparadu no formadu, tanba governu ida-ne’e prepara ona atu mobiliza rekursu umanu, instituisaun no parseiru sira hodi asegura katak sistema edukasaun ba Timor-oan, iha profisionál ne’ebé aas liu dezafiu sira iha sékulu 21.
Iha fatin hanesan, Sekretáriu Estadu ESJ-ESTV, hateten, ohin Ministériu Edukasaun asina memorandu ho Institutu São João de Brito Liquiçá, hodi prepara formasaun ba profesór bolsa kandidatura husi Ensinu Sekundáriu Jerál no Ensinu Sekundáriu Tékniku Vokasionál iha tempu badak.
“Profesór ne’ebé tuir formasaun ne’e hamutuk na’in 250. Etapa Primeiru hahú profesór na’in 125 husi loron 1 fulan Dezembru to’o loron 6, no etapa segundu profesór 125, iha loron 8 fulan Dezembru. formasaun ne’e iha módulu 5 mak Profesór sira sei hetan iha formasaun, hanesan Lejislasaun, Pedagójiku, Kurríkulu, Informasaun Komunikasaun no Teknolojia (ICT) no Fraternidade Umana.” Dehan Sekretáriu Estadu ESJ-ESTV, Domingos Lopes Lemos
Sekretáriu Estadu afirma, husu profesór sira atu aproveita tempu ho di’ak durante formasaun no tenke iha seriedade, tanba formasaun karakter profesór ne’e importante tebes ba profesór sira iha profisaun loron-loron nian.
Iha sorin seluk Reitór Institutu São João de Brito, Reverendu Pe. Isaías Abílio Caldas, momentu ida-ne’e hanesan konfiansa ida-ne’ebé estadu Timor-Leste liuhusi Ministériu Edukasaun depozita mai Institutu atu bele servisu hamutuk hodi lori edukasaun ba kualidade ida-ne’ebé di’ak liu.
“Edukasaun Timor-Leste nian ne’e ita hotu-hotu nia responsabilidade, ida-ne’e hanesan konfiansa ida ne’ebé tenki ezije ami-nia responsabilidade hodi kontribui, servisu hamutuk atu bele kontribui ba edukasaun ida ne’ebé di’ak liubá Timoroan hotu.” Dehan Reitór ISJB. Reverendu Pe. Isaías Abílio Caldas
Reitór ISJB hatutan, haree kona-ba edukasaun iha Timor-Leste ne’e ema hotu nia responsabilidade bele servisu hamutuk hodi kontribui edukasaun ida ne’ebé di’ak liuba Timor-oan iha rai ida ne’e.
Prezidente INFORDEPE. Domingos Martins hateten, ohin asinatura akordu kooperasaun no programa kontratu ne’e, atu estabelese implementasaun kursu formasaun preparatória ba dosénsia hamutuk na’in 250 Ensinu Sekundária sira husi Bolsa Kandidatu ne’ebé sei fahe ba faze rua hanesan: Faze I profesór hamutuk 125 mak sei bá tuir uluk formasaun iha loron 1 to’o loron 6 Fulan Dezembru no faze II, profesór hamutuk na’in 125 sei kontinua fali formasaun iha loron 8 to’o loron 13 Fulan Dezembru.
“Objetivu prinsipál husi kursu ida-ne’e atu asegura profesór foun sira ne’ebé foin tama iha profisaun profesór nian presiza iha abilidade edukasaun, téknika no étika ne’ebé presiza atu asegura edukasaun ho kualidade iha eskola hotu-hotu.” Dehan Prezidente INFORDEPE, Domingos Martins
Prezidente INFORDEPE hatutan, treinamentu ne’e sei fó direta husi treinadór na’in 17 ne’ebé kualifikadu tebes husi INFORDEPE, Ministériu Edukasaun, Institutu São João de Brito no entidade parseiru sira-seluk hanesan Polísia Nasionál Timor-Leste (PNTL), ne’ebé atu asegura formasaun ba formasaun uniforme loron-loron, husi dadeer no lokraik, ba profesór sira hotu ne’ebé partisipa iha faze I no II no apoiu husi Sekretaria Estadu Igualdade hodi garante partisipante sira atu moris iha esperiénsia formasaun ida-ne’ebé komprensivu, promove dixiplina, responsabilidade no espíritu komunidade.
Esplika liutan formasaun ne’e sei hala’o iha Sentru Formasaun ESTV Corluli, ne’ebé lokaliza iha Aldeia Moleana, Suku Ritabou, Postu-Administrativu Maliana, Munisipiu Bobonaro, ne’ebé ninia infraestrutura sira prepara ona atu hala’o atividade formasaun ne’ebé intensivu ba kapasitasaun manorin sira-nian.
Reportajen : Nelfiano
Foto : Media ME