Dili, 04 Juñu 2025 (Média Democracia) – Profesór husi Ensinu Sekundariu Gerál Colégio São João Paulo II Bedois, hala’o komunikadu imprensa la menta ho deklarasaun husi Deputada balun ne’ebé dehan Profesór balun halo kobransa ilegál iha eskola.
Porta-voz Hermenegildo Soares Andrade hateten, liuhusi konferensia ida ne’e, nu’udar Profesór husi Ensinu Sekundariu Gerál Colégio São João Paulo II Bedois kontra deklarasaun ne’ebé hato’o husi Deputada Olinda Guterres iha reuniaun plenaria iha loron 2 fulan juñu tinan 2025 ne’ebé hateten katak iha Profesór balun ne’ebé halo kobransa ilegal ba estudante husi Colégio São João Paulo II Bedois, ho osan montante 20 dolar ba kada estudante husi 10º ano to 12º ano.
“Ami deklara katak esteitmentu husi Distinta Deputada Olinda Guterres ne’e lalos ka halo deklarasaun falsu ida ba iha publiku ba asuntu ne’ebé Deputada levanta la bazeia ba iha regulamentu interna husi eskola Ensinu Sekundáriu Gerál Colégio São João Paulo II Bedois tuir mata dalan katak, alunu labele lori telefone mai eskola, karik Profesór hetan sei entrega ba alunu nia inan no aman.” Dehan Porta-voz Hermenegildo Soares Andrade
Porta-voz ne’e informa, sira duvida ho Distinta Deputada ne’ebé halo esteitmentu kona-ba asuntu familia/bei oan iha reuniaun Plenaria Nasional. Tuir los iha problema Nasional balun ne’ebé mais importante liu atu Parlamento Nasional diskute laos ba Plenaria levanta fali asuntu familia iha ne’ebá no fahe informasaun falsu tan.
“Ami Profesór sira lamenta ho Distinta Deputada Olinda Guterres nia kapasidade atu distingue problema nasional, problema familiar no problema regulamenta interna eskola nian. Distinta Deputada halo fali hanesan fatin atu defende familia nia interese, nune’e ami husu ba Deputada antes atu fó informasaun tenke hatene lai mak halo levantamentu atu nune’e labele fó informasaun falsu ba publiku.” Informa Porta-voz
Nia reafirma tuir regulamentu eskola nian ne’ebé iha ona ba alunu sira bainhira lori telefone no Profesór sira hetan sei foti tiha telefone husi alunu ka aluna ne’e, depois sei entrega ba alunu ne’e nia inan-aman, maibé la husu estudante atu selu ka Profesór sira atu halo kobransa ilegal ne’e la loos.
Reportajen : Domingas
Foto : Domingas