Dili, 25 Marsu 2026 (Média Democracia) – Orgaun Polisia Sientifika Investigasaun Kriminal (PSIC) halo ona indentifikasaun ba suspeitu inisial SF ne’ebé komete krime Exibisionismo sexual hodi hatudu oin lulik ba vitima feto idade 13 ho inisial PS iha area loja Xina ida iha Marskarinas Dili, foin lalais.
Porta-vos PSIC, Mario Tavares hateten, kazu ne’e akontese iha loron sabadu (21/03/2026) bainhira sidadaun feto halo hela kompras sasan iha loja xina nian ida iha Maskarinas, mak suspeitu mane ne’e tama tuir ba loja laran hodi hatudu ninia oin lulik ba iha vitima ne’e.
“Iha sabadu foin lalais, servisu piketi no prevensaun PSIC sira simu keixa ida ba labarik mane ida ne’ebé hatudu nia oin lulik ba alin feto ida nia oin, no hatudu mós ba labarik nia inan hotu dala-ida.” Porta-voz Mario informa ba Jornalista sira iha kna’ar fatin PSIC, Kaikoli, tersa-feira (24/03/2026)
Porta-voz hatutan, tuir motivu kazu ne’e katak, suspeitu hatudu ninia oin lulik ba vitima feto ne’e, iha momentu ne’e suspeitu ka’er hela ninia penis hatudu ba vitima ne’e.
Porta-voz ne’e haktuir, kazu ida ne’e, la’os foin akontese, maibé dalabarak akontese iha sosiedade no sosiedade mós rona mane balu mi tan ba ema seluk nia leten, nomos hatudu nia oin lulik ba iha feto sira.
“Ba kazu ne’e, alin feto (vitima) ho idade 13 halo kompras hela, maibé alin mane ne’e tama ba hatudu ninia oin lulik ba alin feto dala-rua.” Haktuir Porta-voz Mario
Ho kazu ne’e, parte investigasaun PSIK mós rekolha ona provas sira hotu hanesan, provas balun mak dijitais iha kada CCTV iha loja xina ne’e, hodi sai hanesan prova ida katak, suspeitu ne’e hatudu oin lulik duni.
Nune’e ba kazu refere iha kodigu prosesu penal suspeitu komete krime Exibisionismo sexual, hahalok ida ne’e mane ka feto hatudu ninia parte jenital ka oin lulik ba publiku, ne’e krime ida ne’ebé kosta iha artigu 181 husi kodigu penal.
“Bazeia ba keixa, polisia halo ninia servisu indentifika suspeitu ne’e liuhusi motor ne’ebé nia utiliza. Entaun husi motor ne’ebé nia uza iha sabadu ne’e servisu DNTT taka, entaun horiseik sira konsege to’o iha indentifikasaun fatin suspeitu nian liuhusi ninia motor ne’ebe iha.” Infoma Porta-voz
Parte investigador PSIC mós halo konfirmasaun ba suspeitu ninia pajina ofisial Facebook nian, nune’e ikus mai polisia konsege to’o iha ninia fatin. Iha parte seluk mós, wainhira suspeitu halo ninia aktus ba vitima ne’e suspeitu la taka ninia oin uza kapaseti no PSIK konsege halo indentifikasaun prosesu.
Nia esklarese, horiseik (23/03/2026) PSIK remata ona faze indentifikasaun ba iha suspeitu, no PSIK sei submete autor notisia krime ba iha Ministeriu Publiku (MP).
“Ita konsege halo ona indentifikasaun ba prosesu refere. Andamentu ba prosesu ne’e la’o tiha ona, ita produs hela auto notisia krime Exibicionismo sexual no bele mós indikasaun koasaun sexual karik suspeitu ka’er tiha vitima nia isin sensitivus nian.” Dehan Porta-voz
Porta-voz hatutan, PSIC labele detein suspeitu refere, tanba haree mós ba sirkuntansia krime semi publiku, nune’e mak halo de’it faze indentifikasaun ba suspeitu hodi produs auto notisia krime ba iha Ministeriu Publiku.
“Ita halo tiha indentifikasaun, husik nia fila no husik prosesu normal hodi konstitui nia sai hanesan arguido ba iha kazu ne’e.” Subliña Porta-voz
Entretantu, iha loron segunda (23/03) haleu tuku 4:00 Otl lokraik, PSIC halo kapturasaun iha nia hela fatin area Mascarinas hodi halo ona indentifikasaun ba iha suspeitu refere.
Reportajen : Estefania
Foto : Estefania