Dili, 18 Marsu 2026 (Média Democracia) – Embaixadór Rúsia ba Indonézia, Serrgei Gennadievich, halo vizita kortezia ho Ministru Defeza Kontra Almirante Donaciano do Rosário da Costa Gomes Pedro “Klamar Fuik ” hodi diskute kooperasaun bilateral entre parte rua hodi estabelese “Kooperasaun Umbrella ho Timor-Leste iha domínio Defeza.
“Señór Embaixadór Sergei sai Embaixadór Rúsia mai iha Indonézia akomula Timor-Leste, ohin halo vizita ida, vizita dekortezia no mai mós ko’alia kooperasaun entre Timor-Leste ho Rúsia ne’ebé ami konkorda ona para atu estabele akordu protokolár ida depois define atividade saida-saida de’it mak atu halo.” Dehan Ministru Defeza Pedro Klamar Fuik hafoin enkontru Embaixadór Rúsia Sergei tersa (17/03/026)
Embaixadór Rúsia ba Indonézia, Sergei, ohin halo vizita dekortezia iha Timor-Leste hodi diskute kooperasaun bilateral, ho parte rua konkorda atu prepara akordu protokolár ida ne’ebé sei define atividade sira iha futuru.
Ministru Defeza hatutan, liuhusi vizita kortezia ne’e parte rua deside akordu protokolár hodi define atividade iha multilaterál inklui kooperasaun ba iha ASEAN.
“Primeiru ami sei halo akordu protukulár bolu akordu embrela para depois define saida deit hodi konstitui interese ita-nia Timor-Leste ho Rúsia ne’e bele halo hamutuk nomos define atividade saida de’it mak Rúsia bele halo iha Timor no Timor-Leste bele halo saida ho Rúsia iha ambitu rua ida bilaterál ida multilateral inklui iha ASEAN Timor-Leste.” Hatutan Ministru Defeza Pedro Klamar Fuik
Rúsia nu’udar País amigo dezde tempu difisil iha prosesu libertasaun nia laran to’o ohin loron kontinua.
“Rúsia sempre hamutuk ho Timor-Leste, iha 1975 to’o fali 1999, husi 99 to’o ohin loron Rúsia sempre hamutuk ho Timor-Leste, pezar imi hatene hotuhotu hatene katak mundu la’o tuir nia lalaok, maibé rai hotu-hotu, ida-idak ho nia prinsipiu ne’ebé bele partilla ho sira, hanesan mós sira partilla ho ita.” Informa Ministru Defeza
Nia subliña, prinsipiu ba direitu internasionál, prinsipiu ba direitu umanu prinsipiu ne’ebé valoriza nasaun soberana sira rai ki’ik ka rai boot iha direitu hanesan, rai riku ka rai kiak hotu-hotu lian hanesan.
Iha fatin hanesan, Embaixadór Rúsia ba Timor-Leste Segei Gennadievich, hato’o obrigadu ba Ministru Defeza Timor-Leste ne’ebé bele simu hodi halo enkontru diskute kona-ba kooperasaun bilaterál ne’ebé la’o di’ak tebes.
Embaixadór Rúsia ba Timor-Leste hateten, Timor-Leste nu’udar amigo di’ak Rúsia nian, dezde 1975 ne’ebé sempre suporta Timor-Leste iha situasaun difisil.
“Tanba ne’e ohin ami atu kontinua promove kooperasaun ho Timor-Leste iha área kooperasaun militár no kooperasaun iha área teknika. Nune’e ho okaziaun ne’e ami ko’alia hodi kontinua promove relasaun bilaterál ba independensia, igualudade, sobernia no determinasaun no labele iha intervensaun.” Dehan Embaixadór Rúsia ba Timor-Leste Segei Gennadievich,
Diplomata Rúsia ne’e hateten, iha okaziaun ne’e mós ko’alia kona-ba situasaun geopolitika mundiál ne’ebé akontese turbulensia no nakonu ho problema.
Reportajen : Estefania
Foto : Estefania