Díli 18 Outobru 2024 (Média Democracia) – Sekretaria Estadu Igualdade (SEI), Elvina Sousa Carvalho Hafoin halo enkontru Rede Referal Advokasia no Juridiku trimestral Da-toluk nian, enkoraza mós feto maluk sira tenki sai na’in ba rai tanba lei fó dalan atu feto sira mós iha direito atu hetan no sai na’in ba rai. Lia hirak ne’e bainhira Sekretaria Estadu Igualdade (SEI) informa na jornalista sira iha Salaun Maria Gurete Caicoli Díli.
Iha entervista ho Sekretaria Estadu Igualdade (SEI) Elvina Sousa Carvalho hataten, Lei fó dalan ba feto sira atu bele sai na’in ba rai liu-liu iha familia ida nian laran, maibé too agora sei nafatin hetan deskrimisaun iha familia.
“Iha Lei previsaun legal fó dalan ba feto sira atu sai na’in ba rai, maibé realidade sei nafatin lá fó no sei nafatin deskrimina feto atu sai na’in ba rai, ida mós ne’e fila–fali ba feto maluk sira, maibé feto sira mós presija hetan eransa, liuliu ba rai, uma no sasan. Neduni ita tenki rekere ita-nia direitu. Ha’u nafatin enkoraza feto maluk sira ne’ebé sai vítima liu-liu iha família uma laran, no hetan hela deit diskriminasaun sira, no bainhira familia ida atu fahe rai maibé la envolve feto maluk sira atu hetan rai, ida ne’e kontra Lei.” Dehan SEI Elvina Sousa iha Salaun Maria Gurete Caicoli Díli.
Nia hatutan liután katak husu ba feto maluk sira tenki brani hamrik hodi bele rekere sira nia direitu ba rai.
“Husu ba feto maluk sira, nafatin hamrik metin hodi bele izizi mós imi nia direitu liuliu atu sai nain ba rai ka sasan no uma sira. Tanba feto ho mane iha direitu hanesan atu hetan sasan ruma husi família uma laran. Oan atu feto ka mane tenki iha direitu atu sai na’in ba rai, tanba iha lei mós fó ona oportunidade no direitu ba feto bele hetan eransa.“ Dehan Nia
Nia esplika liután katak, husu nafatin ba feto maluk no enkoraza nafatin feto sira hotu atu hamrik nafatin hodi izizi nafatin, nune’e bele hetan rai ka sai na’in ba rai, tanba moris iha familia ida nia laran liu-liu oan feto no oan mane tenki hetan direitu hanesan ba sasan sira liu-liu atu sai na’in ba rai, tanba lei fó dalan.
Reportajen : Tomas
Foto : Tomas