Dili, 12 Dezembru 2025 (Media Democracia) – Sekretáriu Estadu Igualidade (SEI) no Fokupers hamutuk ho maluk feto, mane hala’o marsa hahú husi rotunda Saudozu Nicolao Lobato Comoro ba sentru saúde Golgota liubá rai kotu remata iha área Tasi 3 hodi selebra loron 16 ativísmu kontra violensia hasoru feto, iha Timor-Leste.
Diretora FOKUPERS, Domingas Afonso Amaral hateten, dadus ne’ebé hatudu husi FOKUPERS nia rejistu barak tebes maibé kazu 60 mak konsege kontinua halo akompañamentu ba prosesu legal hodi asesu ba justisa, kazu sira ne’e mai husi violasaun sexual ne’ebé akontese iha rai laran.
“Dadus ne’ebé ami rekolla hahu husi Fulan Janeiru to’o Setembru tinan 2025 hamutuk 179 ne’ebé rejista iha Fokupers nia data baze no husi kazu hirak ne’e 60 konsege kontinua halo akompañamentu ba prosesu legal asesu ba justisa nian. Ita haree katak kazu balun rezultadu positivu no iha kazu balun mós aselera lalais liu hanesan kazu violasaun sexual, nune’e suspeitu hetan ona pena prizaun ba tinan 10.” Dehan Diretora Fokupers, Domingas Afonso Amaral
Diretora hatutan, kazu ne’ebé durante ne’e rejista maioria husi violasaun fiziku ho numeru ne’ebé aas liu, konsiente katak kazu ba iha violasaun sexual no ba labarik kontinua numeru-aas, maioria ida ne’ebé barak liu mak kazu abandona.
“Ha’u hanoin durante ne’e parte hotu halo esforsu lubuk ida ba prevensaun liuhusi sosializasaun, formasaun no fahe informasaun husi Plataforma média sosial, atu bele bolu ema hotu atu atensaun no prevensaun inklui muda konsiensia hapara violensia. Maibé ita nafatin halo sensibilizasaun ba feto no mane sira iha parte prevensaun ne’ebé iha kolaborasaun mane sira bele redus halo violensia no halo komunikasaun ne’ebé saudavel hahu husi familia to’o sosiedade nia leet.” Hatutan Diretora Fokupers
Diretora afirma, dadaun ne’e dadus ne’ebé iha kuaze mai husi Munisípiu Liquiça ho numeru violasaun domestika no sexual makaas ne’ebé mai rejistu iha FOKUPERS no tuir fali Munisípiu Ermera no Munisípiu seluk kuaze atu hanesan.
Iha sorin seluk partisipante Faustina Filomena R. L. da Conceção hateten, sente orgullu no kontente bele hola parte iha atividade sensibilizasaun ne’e, hodi hakle’an koñesimentu, nune’e utiliza Plataforma dijital sira la’o tuir nia dalan no hatene mós kona-ba violensia domestika, oinsa bele halo prevensaun.
“Ha’u nia parte bainhira partisipa iha atividade ne’e sente kontente tebes, tanba bele komprende di’ak liután saida mak violensia domestika ba labarik feto no mane. Ho atividade ne’e hanesan oportunidade mai ha’u atu bele hatene informasaun sira kada tinan ida dala ida, tanba problema hirak ne’e akontese dalaruma ita la hatene maibé liuhusi atividade ne’e bele aumenta tan koñesimentu.” Dehan Partisipante Faustina Filomena
Partisipante ne’e hatutan, husu ba alin feto sira agora utiliza hela media sosial Facebook no Tiktok uza barak ona, tanba ne’e uza tenke tuir nia dalan bainhira halo komunikasaun presiza respeitu malu tanba buat hotu uza tuir etika ida-idak nian.
Esplika liután atividade marsa lao ain ida ne’e hodi selebra loron 16 ativísmu kontra violensia hasoru feto no labarik feto sira iha Timor-Leste. Aleinde ne’e iha atividade bele hasa’e konsiensia literasia Digitál no Online seguru ba feto no labarik feto iha Diversidade hotu no ensera atividade kampaña refere.
Reportajen : Nelfiano
Foto : Nelfiano