Dili, 19 Dezembru 2025 (Média Democracia) – Sekretária Estadu ba Igualdade-SEI liuhusi Diretora Nasionál Dezenvolvimentu Jéneru-SEI partisipa no hato’o mensajen iha selebrasaun Loron Munidiál ba Ema ho Defisiénsia no atividade diálogu nivel Munisipál ho Tema “Haburas sosiedade ne’ebé inkluzivu ba defisiénsia hodi avansa progresu sosiál.” Atividade refere Média Democracia asesu husi pajina SEI, Sexta semana ne’e.
Diretora Nasionál Dezenvolvimentu Jéneru-SEI, Olga da Costa Monteiro hateten, liuhusi selebrasaun ida-ne’e sei hamosu konxiénsia no kompreensaun públika hodi kompriende katak defisiénsia la’os limitasaun ba valor ema, maibé kondisaun ida ne’ebé presiza apoiu, asesibilidade no respeitu promove no defende Direitu Ema ho Defisiénsia.
Diretora Nasionál Dezenvolvimentu Jéneru-SEI hatutan, direitu ba ema difisiensia hanesan edukasaun, saúde, servisu, partisipasaun sosiál no polítika hanesan parte husi direitu umanu universal, kombate estigma no diskriminasaun ne’ebé Ema ho Defisiénsia sira hasoru hanesan estigma no diskriminasaun.
“Fó lian no visibilidade ba Ema ho Defisiénsia liuhusi fó oportunidade ba Ema ho Defisiénsia atu hato’o sira-nia esperiénsia, aspirasaun no rekomendasaun ba desizaun-na’in sira, hametin kompromisu Governu no parseiru liuhusi husu ba Governu, autoridade lokál no parseiru dezenvolvimentu kona-ba obrigasaun atu implementa politika no programa inkluzivu ba ema ho defisiénsia.” Hatutan Diretora Nasionál Dezenvolvimentu Jéneru-SEI
Diretora Nasionál afirma, insentiva husi partisipasaun ativa Ema ho Defisiénsia iha dezenvolvimentu hodi kontribui ba progresu sosiál, ekonomia no dezenvolvimentu komunidade no haburas sosiedade inkluzivu no Justu liuhusi hametin valór solidariedade no inkluzaun, hodi garante katak la husik ema ida iha kotuk iha prosesu dezenvolvimentu nasionál.
Esplika liután hanesan instituisaun Estadu ne’ebé tau-matan ba iha asuntu igualdade jéneru no inkluzaun sosiál husu ba hotu-hotu atu asegura asesibilidade iha servisu públiku no infrastrutura no kontinua fó apoiu ba partisipasaun ativa Ema ho Defisiénsia iha prosesu foti-desizaun nian. Aleinde ne’e selebrasaun ne’e realiza iha salaun parokia Becoar no ograniza husi Klibur Defisiénsia Tilun Timor-Leste (KDT-TL).
Reportajen : Nelfiano
Foto : Media SEI