Dili, 31 Janeiru 2025 (Média Democracia) – Sekretária Igualdade no Jéneru (SEI), realiza enkontru ho Ministru Interior hodi introdúz kona-ba komprimísiu promove igualdade jenéru no inkluzaun iha Timor-Leste.
Objetivu husi enkontru ne’e atu intrudúz polítika ka Komprimisiu Jéneru ba Ministru Interiór atu nune’e bele implementa Polítika, Lejislasaun no Programa sira iha Perspektiva Jéneru.
Tanba Ministériu Interior hanesan Ministériu xavi implementa komprimisiu jéneru, Politika Komprimisiu Jéneru mak Planu Asaun Nasionàl Violensia Bazeia ba Jéneru, PAN EhD, PAN, 1325 kona-ba Feto Paz no Seguransa, Inklui Komvensaun CEDAW.
Iha sorumutuk ne’e Sekretaria Estadu ba Igualdade Elvina Sousa Carvalho, agradese ba Ministru Interior ho Jerente sira tanba bele hasoru malu ho Ekipa SEI, tanba enkontru refere nu’udar advokasia liña Ministeriu.
“Ministeriu Interior hanesan Ministeriu xave ba implementasaun Komprimisiu Jéneru no Inklusaun iha Timor-Leste, advokasia ne’ebé durante ne’e ami halo entre tekniku ho tekniku hasoru malu hodi halo diskusaun liu-liu iha grupu traballu Jéneru nian, sempre halo diskusaun no ohin ita hasoru malu direitamente ho lider masimu iha Ministeriu liu-liu nain Ministru atu nune’e advokasia ne’e tenke mai husi nain Ministru rasik.” Hatete Elvina iha Pájina Ofisiál ne’ebé Media Democracia asesu iha loron sexta (31/01)
Governante ne’e haktuir katak bazeia ba lei ne’ebé atribui iha Sekretaria Estadu ba Igualdade nia papel mak lidera hodi halo advokasia sira ba promosaun igualdade iha Timor laran tomak.
“Asegura katak liña Ministeriais sira iha planu Politika, planu orsamentu, planu asaun anual, legislasaun sira tenke sensivel ba asuntu Jéneru iha Timor-Leste, nomos tenke kumpri ba iha komprimisiu Jéneru sira ne’ebé Timor-Leste Adopta hanesan planu asaun nasionàl violensia bazeia ba Jéneru, PAN EhD, PAN, 1325 kona-ba Feto Paz no Seguransa, Inklui Komvensaun CEDAW.” Nia haktuir
Ekipa SEI sei halo aprezentasaun mós ba orsamentu sensivel ba Jéneru nomos hodi kolia kona-ba Papel ka komprimisiu Ministeriu Interior ne’ebé nu’udar nain ba rezolusaun 1325 Feto Paz no Seguransa, deklarasaun maubesse 3 nomos PAN-VBJ.
Sua Eselensia Sekretária Estadu ba Igualdade mós informa katak enkontru refere la’os de’it ho Ministériu Interior maibé realiza enkontru ho Liña Ministériu seluk ne’ebé implementa komprimisiu Jéneru iha Timor-Leste inklui mós BNCTL.
Iha fatin hanesan Ministru Interior Francisco da Costa Guterres hatutan katak, durante ne’e Ministériu Interior establese departamentu ida ne’ebé haree liubá edukasaun sivika no tutela iha Diresaun konflitu nian.
“Hodi haree ba igualdade Jéneru, Ministeriu Interior mós sei realiza kampaña ida hodi hasae konsensia Joventude sira nian nomos oinsá muda mentalidade Joventude sira nian, husi Departamentu ne’e rasik lidera husi Feto.” Dehan Ministru Interior
Iha sorumutuk ne’e Ministru Interior ne’e informa katak Ministeriu Interior nu’udar Ministériu Implementadór ba Rezolusaun PAN 1325, komprimísiu Igualdade Jéneru nomos rekomendasaun CEDAW, sériu hodi implementa Komprimisiu ne’ebé iha.
Remata enkontru Sekretária Estadu ba Igualdade entrega mós deklarasaun Maubisse 3, Manual Igualdade Jeneru iha Timor-Leste nomos Planu Nasionál Kontra Violénsia Bazeia ba Jéneru, inklui halo aprezentasaun material balun ligadu ba iha rekomedasaun CEDAW, Planu Asaun Nasionál Rezulusaun Seguransa Nasoens Unida 1325, Feto Pas no Seguransa ba iha Ministeriu Interior, Planu Asaun Anuál orsamentu nomos promosaun igualdade.
Aprezentasaun refere, aprezenta direitamente husi Xefe Departamentu Empoderamentu Ekonomia Feto, Henrique da Silva ba iha Ekipa Ministeriu Interiór rasik.
Entretantu iha sorumutuk Ekipa husi Sekretaria Estadu ba Igualdade, Sua Eselénsia Elvina Sousa Carvalho, ne’ebé akompaña husi Asesora Abordajen Integradu Jéneru-SEI, Diretora Nasional Politika Igualdade Jéneru, Xefe Departamentu Abordagen Integradu Jéneru-SEI, Xefe Departamentu Prevensaun no Kombate Violénsia Bazeia ba Jéneru no Xefe Departamentu Empoderamentu Ekonomia Feto, realiza enkontru ho Sua Exelénsia Ministru Interiór Francisco da Costa Guterres ho Kargu Diretór no Xefe Departamentu Ministeriu Interior sira, iha Edifisiu Ministeriu Interior, Caicoli, Dili.
Reportajen : Estefani
Foto : Pajina SEI