Dili, 22 Setembru 2025 (Média Democracia) – Sekretária Estadu ba Igualdade (SEI), Ministeriu Justisa, hamutuk ho Ekipa Traballu Téknika Jurídiku ne’ebé kompostu husi tékniku jurídiku Ministériu Justisa, Sosiedade Sivíl ne’ebé kompostu husi TAF-Nabilan, Fokupers, ALFeLa, Fundasaun Alola no JSMP realiza sorumutu hodi aprezenta esbosu revizaun finál kona-ba Lei Kontra Violénsia Doméstika iha Timor-Leste. Aprezentasaun LKVD refere Média Democracia asesu husi pajina S.E.I, Segunda semana ne’e.
Sekretária Estadu ba Igualdade (SEI), Elvina Sousa Carvalho hateten, parabéns ba iha ekipa Traballu Téknika Jurídiku sira ne’ebé kuaze Timor-oan de’it no husu atu presiza halo nota justifikasaun ba iha aditamentu no revizaun sira ba kada artigu molok ba aprezenta iha Konsellu Ministrus no iha Parlamentu Nasionál.
“Lei Kontra Violénsia Doméstika ne’e eziste ona durante tinan sanulu resin, liuhusi Lei Nú. 7/2010, loron 7 fulan-jullu, tanba ne’e to’o ona tempu atu halo revizaun liuliu ba iha artigu sira ne’ebé ladún refleta ona.” Dehan Sekretária Estadu ba Igualdade (SEI), Elvina Sousa Carvalho
Sekretária Estadu ba Igualdade hatutan, nune’e mós presiza atu harmoniza fila-fali, liuliu ninia definisaun no artigu husi implementasaun ba Lei Kontra Violénsia Doméstika no oinsá mak lei ne’e bele efetivu iha ninia implementasaun atu redús no kombate Violénsia Doméstika iha future.
Iha fatin hanesan Ministru Justisa, Sérgio de Jesus Fernandes da Costa Hornai hateten, ohin hola-parte iha ambitu aprezentasaun no diskusaun husi grupu traballu relatóriu preliminár kona-ba Lei Kontra Violénsia Domestika (LKVD sigla tetun), ne’ebé durante ne’e akontese iha rai laran
“Ohin ita bele tau hamutuk iha sura-tahan ida, hodi nune’e, bele prokura revogasaun ka alterasaun ruma ba iha proposta alterasaun kontra violénsia domenstika ne’e.” Dehan Ministru Justisa, Sérgio de Jesus Fernandes da Costa Hornai
Ministru Justisa hatutan, ekipa ida ne’e konsolidadu, integra Diretór Jerál sira, Diretór Nasionál sira nomos parseiru organizasaun sira hotu, hanesan Asisténsia Legál ba Feto no Labarik (ALFeLa), The Asia Foundation (TAF) Nabilan, Rede Feto, Judicial System Monitoring Programme (JSMP), FOKUPERS no seluk tan.
Esplika liután iha relatoriu preliminár ne’e, aprezenta Proposta kona-bá Alterasaun Lei Kontra Violénsia Doméstika, ne’ebé foka liubá konseitu krime insestu, hodi fortalese protesaun no prevensaun ba família iha Timor-Leste. Grupu traballu refere komposta husi Minsitériu Justisa liuhusi Diresaun Nasional Asesoria no Lejizlasaun, Sekretária Estadu Igualdade, parseiru estratéjiku Dezenvolvimentu Nasionál sira.
Reportajen : Nelfiano
Foto : Media SEI