Dili, 15 Maiu 2025 (Média Democracia) – Sekretária Estadu Igualidade (SEI) hamutuk ho Ministeriu relevante hala’o abertura ba iha Sorumutuk Workshop Pre-Validasaun Internál SEI kona-ba Esbosu Matadalan ba iha Implementasaun Deklarasaun Maubisse nian ba Faze Datoluk, Atividade ne’e Média Democracia asesu husi pajina ofisial SEI, Tersa Semana ne’e.
Diretor Jeral Sekretariu Estadu Igualidade (SEI) Armando da Costa hateten Deklarasaun Maubisse dokumentu ida agora ba datoluk nian ne’e hetan rekoñesimentu iha Nivél Rejiaun nomos hodi hakle’an no fahe esperiénsia servisu ba malu, iha dokumentu ne’e hanaran Deklarasaun Maubisse to’o ona forum iha nivel Mundiál.
“Objetivu Jerál husi Sorumutuk Workshop Pre-validasaun Internál atu atualiza informasaun kona-ba progresu dezenvolvimentu Matadalan ba Implementasaun Deklarasaun Maubisse Faze Datoluk iha Liña Jestores S.E.I nian.” Dehan Diretor Jeral Sekretariu Estadu Igualidade S.E.I Armando da Costa
Nia hatutan rezultadu Mini Workshop ne’e Diresaun no Departamentu relevantes hotu bele apoiu koordenasaun entre SEI no Liña Ministériu sira inklui BNCTL ba implementasaun Deklarasaun Maubisse Faze Datoluk (III), Revizaun esbosu matadalan molok lori ba kolókiu validasaun ho entidades implematadór 17 + BNCTL ne’ebé tentativamente sei hala’o iha loron 15 fulan maiu 2025 no koodenasaun ho preparasaun ba lansamentu formal Matadalan Implementasaun Deklarasaun Maubisse nian.
“Iha Nivél Rejiaun Ázia Pasífiku, tinan kotuk ita hetan apresiasaun (AWARD) ida ba iha Care Economic ka Ekonomia Kuidadu, no ida ne’e mós ho konsiderasaun ba esforsu ne’ebé Estadu Timor-Leste liuhusi Sekretaria Estadu ba Igualdade SEI no parseiru liña Ministeriais sira hala’o iha implementasaun ba establese Deklarasaun Maubisse.” Dehan Diretor Jeral SEI
Nia afirma nune’e agora matan barak iha Mundu hateke mai Timor-Leste kona-ba komitmentu atu atinje igualdade, redús no kombate dezigualdade liuhusi dokumentu ida hanaran, Deklarasaun Maubisse.
“Ita atu hala’o kna’ar ho di’ak ho parseiru sira depois servisu bainhira ita iha Deklarasaun Maubisse Faze Datoluk, ita identiifika katak, iha menus balun, lakunas balun ne’ebé presiza hadia, nune’e ita mai ho konkordánsia ida no prositivu prontu atu suporta ita iha prosesu dezenvolve Matadalan ba iha Implementasaun Deklarasaun Maubisse.” DJ haktuir
Diretor Jeral subliña iha Deklarasaun Maubisse Faze Dahuluk no Faze Daruak nian, daudaun ne’e la halo matadalan, agora ba datoluk ida ne’e iha komitmentu sira ho seriedade hodi halo matadalan atu nune’e SEI ho parseiru sira bele implementa di’ak liután kompromisu sira iha DM-III.
“Programa ne’e hatudu sinais di’ak iha servisu inísiu tinan ne’e nian, husi ekipa Deklarasaun Maubisse III. SEI konsege halo vizita ba Ministériu Xave sira ne’ebé atu implementa halo diskusaun dezenvolvimentu matadalan ba implementasaun Deklarasaun Maubisse. Ministériu relevante hatudu sira-nia komitmentu forte tebes liuhusi envolve iha prosesu diskusaun ba iha Gia Deklarasaun Maubisse Faze Datoluk nian.” Nia informa
Iha sorin seluk Xefe Pilár 2 Jestaun Finansas Públika Prosivu, Vishal Gandhi hateten Pre-validasaun workshop hanesan kontinuasaun husi diskusaun ne’ebé hala’o ona iha fulan haat ka lima liubá hodi haree progresu no partisipasaun.
“Ita partisipa iha workshop pre-validasaun ohin loron nian ne’ebé presiza ema hotu apresia. Husu ba partisipante hotu atu utiliza tempu hodi halibur hanoin di’ak sira oinsá atu hadi’a implementasaun ba iha enkuadramentu monitorizasaun ba iha Deklarasaun Maubisse III, nune’e ita bele haree progresu sira ne’ebé bele atinje tuir kompromisu sira iha Deklarasaun Maubisse nian.” Dehan Xefe Pilar 1 Jestaun Finansas Publiku Prosivu, Vishal Gandhi
Nia hatutan iha oportunidade ne’e atu hato’o apresiasaun ba DG-SEI hodi lidera no halo ona advokasia forte ba igualdade no Inkluzaun no hein katak programa ida ne’e bele susesu iha futuru.
Esplika liután Workshop Pre-Validasaun halo diskusaun husi Sekretariu Estadu Igualidade hamutuk ho liña Ministerial relevante hodi halo diskusaun kona-ba esbosu Matadalan ba implementasaun Deklarasaun Maubisse Faze Datoluk nian.
Reportajen : Nelfiano
Foto : Média-SEI