Dili, 18 Setembru 2025 (Média Democracia) – Sekretária Estadu ba Igualdade (S.E.I) realiza seremonia enkontru regular ho parseiru nasionál hodi haree kona-ba prosesu no dezafiu ba implementasaun programa no atividade ba promosaun Igualidade Jéneru iha Timor-Leste, serimonia ne’e hala’o iha Salaun Maria Gorete Caicoli.
Sekretária Estadu ba Igualdade (SEI), Elvina Sousa Carvalho, hala’o enkontru regular hamutuk ho Parseiru Nasionál sira hodi haree kona-ba Progresu no Dezafiu, ba Implementasaun Programa no Atividade ba Promosaun Igualdade Jéneru, ne’ebé kompostu husi Sosiedade Sivíl.
“Objetivu husi serimónia enkontru refere mak, atu atualiza informasaun kona-ba progresu no dezafiu atu promove igualdade no inkluzaun sosiál iha Timor-Leste, haforsa koordenasaun servisu ho parseiru, buka solusaun ba obstaklu no dezafiu sira hodi hamosu prioriedade iha tempu badak no tempu naruk hodi hasoru dezentralizasaun no poder lokál.” Dehan Sekretária Estadu ba Igualdade-SEI, Elvina Sousa Carvalho
Sekretária Estadu hatutan, iha intervensaun hateten, S.E.I hanesan mákina estadu ne’ebé ho papél no responsabilidade atu koordena no halo advokasia ba iha implementasaun sira, abordajen integradu jéneru, lei, polítika nomos Orsamentu Jerál Estadu, hanesan koordenadór ba advokasia iha asuntu sira ne’ebé ligadu ho promosaun igualdade ne’ebé liga ho Hakbiit Feto, tanba S.E.I hanesan lidera no koordena, bazeia ba S.E.I nia organograma Governu nian fó kompetensia ba S.E.I halo nia servisu ba organograma ka Lei ne’e.
“Atividade ida ne’e nu‘udar atividade ida ne’ebé rutina S.E.I halo, enkontru koordenasaun bele hatene dezafius no progresu ne’ebé ita iha hodi sai hanesan satan ba feto sira nomos ema vulneravel sira bele hakat ba oin.” Hatutan Sekretária Estadu ba Igualdade
Sekretaria Estadu afirma, seremónia enkontru regular refere, iha mós sesaun diskusaun ne’ebé parseiru sira hotu bele atualiza informasaun kona-ba progresu no dezafiu durante iha sira-nia servisu hodi promove igualdade no inkluzaun sosiál iha Timor-Leste.
Iha fatin hanesan Diretora-Nasionál Relasaun Públika no Média (DNRPM-SEI), Maria Filomena Babo Martins iha intervensaun ba iha sesaun enseramentu hato’o apresiasaun ba parseiru sira hotu ne’ebé kompostu husi Kargu Diretores Nasionais, Xefe-Departamentu husi Sosiedade Sivil S.E.I nian, ba implementasaun Igualade Jéneru no Inkluzaun Sosiál iha ita-nia rai Timor-Leste.
“Apresia tebes ba ita-boot sira ne’ebé atualiza informasaun kona-ba ita-boot sira-nia programa servisu, ba atinjimentu ba progresu nomos ba dezafius ne’ebé ohin ita-boot sira hato’o. Ita hein katak atinjimentu mós barak, susesu mós barak, maibé iha dezafiu ita koalia kona-ba igualdade jéneru no Violénsia Bazeia na Jéneru, laos buat fasil. Ita atu reduz iha tinan ida, tinan rua nia laran maibé ita presiza tempu naruk atu bele atinji asuntu hirak ne’e hodi hetan rejultadu ho di’ak.” Dehan Diretora Nasionál Relasaun Públika no Média
Diretora afirma, enkontru parseria ida ne’e objetivu prinsipal oinsá atu hametin no haforsa ho parseria sira atu nune’e bele hamutuk hodi atinji igualdade no redus Violénsia Bazeia ba Jéneru, liu-liu ba feto no labarik-feto ne’ebé kada tinan nia dadus nunka tun maibé kontinua sae ba beibeik.
Esplika liután relasiona ho seremónia Enkontru Regular ho Parseria ne’e mós partisipa mós husi Kargu Xefe-Departamentu no Funsiunáriu/a husi Diresaun sira iha S.E.I hodi koalia kona-ba atu atinji igualdade no redus Violénsia Bazeia ba Jeneru iha Timor-Leste.
Reportajen : Nelfiano
Foto : Media S.E.I