Dili, 22 Abril 2025 (Média Democracia) – Amu Parokia hamutuk Sarani Parokia Balide ohin loron 22 Abril 2025 iha oras tuku 6.00 dader selebra misa hodi fó dedikasaun espesial ba Amu Papa Francisco nia isin mate iha Vaticano Roma, nune’e nia klamar bele sai anju iha mundu foun.
Pradre Vigario Parokia Balide, Cesar Magno hateten, ohin sarani hotu-hotu hamutuk ho amu Parokia Balide selebra misa hodi fó sentidu kondolensia ba Amu Papa Francisco nia mate hodi kontinua halo prosesaun lao-ain husi igreja Balide hodi ba sunu lilin no reza hamutuk iha monumentu Nossa Senhora Lecidere Dili.
“Sarani katoliku hotu-hotu ne’ebé ohin mai hamutuk iha monumentu Nossa Senhora atu presta homenajen, nafatin reza ba amu Papa Francisco nia mate atu hatudu nafatin domin sarani Timor-Leste nian ba iha Amu Papa, tanba domin ne’ebé durante Amu Papa mai vijita hatudu mai ita nune’e hanesan sarani iha relasaun domin nian ba Amu Papa ne’ebé fila ona ba hamutuk aman Maromak kadunan santu iha mundu seluk.” Dehan Padre vigario Balide Cesar Magno
Nia hatutan hanesan nai lulik hanesan mós sarani iha rai doben ida ne’e sente triste tebes, tanba lakon ona bibi atan di’ak ida ne’ebé durante ne’e ho fuan tomak hodi servi no hadomi ema hotu-hotu iha nia simplisidade hakuak mundu ida ne’e.
“Ha’u senti triste tebes tanba lakon ona ita-nia bibi atan di’ak ida ne’ebé durante ne’e servi no hadomi ema hotu iha nia simplisidade iha mundu ida ne’e, hodi hatudu nafatin nia-aan hanesan Maromak ninia atan ne’ebé bali no kuidadu nafatin Maromak nia bibi-oan sira ho nia simplisidade domin ba ema hotu nu’udar kriatura maromak nian.” Dehan nia
Nia afirma haree ba Amu Papa nia vijita mai Timor-Leste iha tinan kotuk husik hela mensajen di’ak ba joven sira liu-liu ba povu tomak. Nune’e husu ba joven sira atu hatudu nafatin identidade hanesan joven kristu moris husi sira nia-aan no buka nafatin barullu iha moris loron-loron liu-liu barullu iha sentidu no fiar nian.
Iha fatin hanesan reprezentante sarani Parokia Balide, Julia Maria hateten, hanesan sarani katolika dala uluk fó sentidu kondolensia ho laran ne’ebé tristeja tebes ba Amu Papa ne’ebé husik hela ona sarani hotu-hotu iha mundu ida ne’e.
“Ha’u sente triste tebes, tanba ho nia prezensa moruk ne’ebé mai vijita iha ita-nia rai doben ida ne’e, ita sente furak tebes no ita-nia fuan sai hakmatek tanba Amu Papa husik hela mensajen ne’ebé moruk mai ita sarani hotu iha Timor-Leste, hatudu katak ita sarani iha fiar domin no pas.” Dehan sarani Parokia Balide, Julia Maria
Nia hatutan hanesan sarani katolika oinsa bele lao tuir dalan sarani nian liuhusi mensajen Amu Papa nian husik hela durante mai vijita iha Timor-Leste katak, sarani hotu tenke lao tuir kristu no domin Maromak nian.
“Ita sente triste tebes tanba Amu Papa foin mai vijita iha ita-nia rai iha fulan hirak liubá kotuk, maibé iha fulan ida ne’e ita iha tristeja boot bainhira rona Amu Papa husik hela ona ita sarani iha mundu ida ne’e liu-liu iha Timor-Leste.” Dehan nia
Nia salienta hanesan sarani katolika Timor-Leste sente triste tebes tanba lakon ona aman ba mundu hotu-hotu liu-liu ba rai doben Timor-Leste, iha momentu vijita Amu Papa husik hela mensajen furak mai sarani hotu.
Esplika liután maske lakon ona bibi atan di’ak ne’ebé durante ne’e servi tane ema hotu-hotu iha mundu, maibé fiar katak liuhusi sarani ida-idak nia orasaun hodi loke dalan ba Amu Papa nia klamar sai nafatin anju da kuarda iha Maromak nia kadunan santu.
Reportajen : Nelfiano
Foto : Nelfiano