Dili, 08 Janeiru 2026 (Média Democracia) – Sekretáriu Estadu Asuntu Toponímia no Organizasaun Urbana (SEATOU), hamutuk ekipa konjunta realiza enkontru ho liña Ministerial sira seluk atu servisu hamutuk, nune’e bele reforsa ekipa hodi organiza sidade iha Timor-Leste ba tinan 2026 nia laran. Informasaun ne’e Média Democracia asesu husi pajina SEATOU, no enkontru refere hala’o iha Sala VIP MAE Kinta semana ne’e.
Sekretáriu Estadu Asuntu Toponímia no Organizasaun Urbana (SEATOU) Germano Santa Brites Dias hateten, enkontru ho Ekipa Konjunta entre liña Ministerial hodi halo koordenasaun servisu ida ne’ebé efetivu liu iha tinan 2026 nia laran.
“Objetivu husi enkontru dahuluk husi ekipa konjunta iha tinan ida ne’e mak atu harii komunikasaun estruturadu no asegura kooperasaun ne’ebé di’ak ligadu ba projetu rehabilitasaun estrada iha Fatuahi, Bidau Santa-Ana to’o Metiaut, Becora, Matadoro no Ponte my friends to’o Pura Taibessi.” Dehan Sekretáriu Estadu Asuntu Toponímia no Organizasaun Urbana (SEATOU) Germano Santa Brites Dias
Sekretáriu Estadu Asuntu Toponímia no Organizasaun Urbana hatutan, aleinde ne’e ekipa konjunta kontinua koalia kona-ba Prosesu levantamentu dadus ba komunidade sira iha área hanesan Aitarak Laran no foka mós ba kria sidade Díli ne’ebé moos no organizadu.
“Ho enkontru ida ne’e rasik mós ekipa konjunta halo Avaliasaun ba Kooperasaun servisu hodi haree fila-fali progresu husi atividade sira ne’ebé durante halo ona iha tinan kotuk, karik iha tinan kotuk failansu ruma nune’e tinan ida agora bele hadia di’ak liután.” Hatutan Sekretáriu Estadu Asuntu Toponímia no Organizasaun Urbana (SEATOU)
Sekretáriu Estadu afirma, relasiona ho enkontru ne’e atu halo avalisaun mós kona-ba servisu ne’ebé durante ne’e SEATOU halo iha tinan kotuk nune’e bele haree fila-fali iha nia progresu servisu, karik iha failansu ruma tinan ida ne’e bele hadia di’ak liután, nune’e sidade bele moos no organizadu.
Sekretáriu Estadu mós enkoraja nafatin ekipa konjunta sira atu servisu di’ak liután no mantein relasaun servisu liuhusi komunikasaun no fó informasaun importante ba kooperasaun, nune’e servisu bele la’o ho di’ak hodi bele organiza sidade ne’ebé moos no organizadu.
Reportajen : Nelfiano
Foto : Media SEATOU