Dili, 05 Juñu 2025 (Média Democracia) – Governu liuhusi Sekretáriu Estadu Asuntu Toponímia no Organizasaun Urbana (SEATOU), servisu ida ohin loron nian kontinuasaun de’it ba programa IX Governu ne’ebé durante ne’e fó sai ona ba publiku, parte ida ne’e atu kontinua halo konstrusaun ba estrada husi Aimutin Lurumata nian tun ba sai iha Embaixada Amérika nia sorin, atividade refere hala’o iha Kuarta Semana ne’e.
Sekretáriu Estadu Asuntu Toponímia Organizasaun no Urbana, Germano Santa Brites Dias hateten, ohin servisu komesa lao ona, husu Autoridade Lokal Xefe Suku no Xefe Aldeia, (OPS), Komandante Eskuadra Dom-Aleixu, MOP inklui Liña Ministerial ho ekipa konjunta SEATOU atu akompaña hodi avisu ba komunidade afetadu, no ba dadus hirak ne’ebé rekolla ona bele lori ba submete iha Ministériu Obras Públika no sira ne’ebé seidauk rekolla dokumentus ne’e tenke rekolla ona tanba ne’e obrigatóriu.
Sekretáriu Estadu hatutan Governu sei fó oportunidade ba komunidade afetadu husi ohin loron 04 to’o 21 Juñu 2025, tenke hamamuk ona fatin, bainhira la kumpri hodi hamamuk fatin refere liuhusi loron determinasaun dalan ikus Governu sei tun direta hamutuk ho kompaña sira ne’ebé hetan tenderizasaun sei hamamuk komunidade sira nia fatin.
“Husu ba komunidade afetadu sira hotu-hotu tenke koopera ho Estadu nune’e bele loke estrada husi Aimutin tun ba Pante-Kelapa Embaixada Amérika nia sorin, nune’e ema hotu bele asesu hodi halo movimentu ba mai.” Dehan Sekretáriu Estadu Asuntu Toponímia Organizasaun no Urbana, Germano Santa Brites Dias
Sekretáriu Estadu afirma, estrada ne’ebé atu halo konstrusaun ne’e ohin tama mai kloot maibé to’o klaran estrada ne’e luan tebes tanba iha uma-kain balun mak harii iha estrada klaran, ida ne’e sai problema. Nune’e nafatin husu ba komunidade tenke koopera ho Estadu hodi bele loke Estrada.
“Komunidade afetadu tenke koopera ho Estadu tuir markasaun ne’ebé Governu sukat ona, tanba servisu sei lao iha fulan ne’e nia laran no atu tama ona ba bailoro. Ita hotu tenke haka’as aan nune’e bele muda sasan ne’e ba iha hela fatin ida-idak nian antes udan mai karik sasan sira ne’e asegura hotu ona iha mahon laran nune’e labele hetan estragus ba komunidade sira sasan.” Nia haktuir
Nia relata, bainhira komunidade afetadu balun ne’ebé durante iha rai privadu Governu husu tenke lori dokumentus ba trata iha Terras depois lori ba submete iha Ministériu Obras Públika inklui uma ne’ebé komunidade sira hela sei selu ho osan hanesan. Sidadaun ne’ebé di’ak tenke koopera ho Estadu depois ita bele uza espasu estrada ne’e ho di’ak.
Esplika liután tuir dadus ne’ebé Ministeriu Obras Públika rekolla total uma-kain 100 resin, tanba iha uma-kain balun kona de’it moru no aihoris. Entaun MOP ho Terras sei haree ba asuntu refere nune’e labele mosu kritika ruma husi ita-nia maluk afetadu sira hotu.
Reportajen : Nelfiano
Foto : Nelfiano