Dili, 07 Maiu 2025 (Média Democracia) – Governu liuhusi Sekretariu Estadu Asuntu Toponímia Organizasaun no Urbana (SEATOU) hateten mosu dezentendimentu husi deputadu Fretilin ba servisu SEATOU nian iha Karentina Tasi-tolu atu muda komunidade sira, sei lori dezentendimentu ne’e ba tribunal hodi prosesu tuir lei.
Sekretariu Estadu Asuntu Toponímia Organizasaun no Urbana (SEATOU) Germano Santa Brites Dias hateten, relasiona dezentendimentu husi deputadu Fretilin hodi mai hapara servisu SEATOU nian iha Karentina Tasi-tolu ba oin sei lori ba tribunal
“Ha’u atu denunsiu ba publiku katak ha’u sei lori prosesu ne’e ba tribunal kona-ba dez-obendensia ne’ebé ohin akontese iha ne’e, ita-nia deputadu sira mai halo intervensaun ba ha’u nia servisu iha terenu ne’e ha’u tenke fó sai iha publiku nune’e ha’u bele lori ba iha tribunal hodi prosesu tuir lei.” Dehan Sekretariu Estadu Asuntu Toponímia Organizasaun no Urbana (SEATOU) Germano Santa Brites Dias
Sekretariu Estadu hatutan tanba servisu hanesan membru governu halo programa XI governu nian ne’ebé hanesan deputadu iha parlamentu nasional no maluk sira seluk tenke tur iha ida-idak nia fatin ne’e, governu nia servisu tanba povu ka populasaun terus iha susar nia laran hanesan bee hoban iha tempu inundadsaun nia laran.
“Iha momentu inundasaun Primeru Ministru hamutuk ho ha’u nia ekipa tomak mak ba hasai populasaun sira husi bee hoban iha tempu kalan no loron evakua mai tau iha Karentina Tasi-tolu. Tanba ne’e prosesu ha’u tenke lori ba Ministeriu Publiku nune’e bele halo prosesu fó hanoin ba maluk deputadu sira ida-idak hakmatek iha fatin nune’e ha’u bele ha’u nia servisu iha terenu.” Dehan Sekretariu Estadu
Sekretariu Estadu haktuir durante halo servisu iha terenu nai Deputadu sira iha Parlamentu Nasional kolia aat hela SEATOU nia servisu maibé nunka ba halo intervensaun iha uma fukun Parlamentu Nasional tanba ida-idak ho separasaun poder servisu ne’ebé diferente.
“Papel atu mai halo fiskalizasaun tenke mai ekipa konjunta husi Parlamentu Nasional nian mak halo fiskalizasaun labele mai ho partidu politika nian hodi interven ha’u nia servisu iha terenu ida ne’e hanesan kontra ona ha’u nia servisu.” Subliña Sekretariu Estadu
Sekretariu Estadu informa ohin diskute malu ne’ebé hatudu ba publiku ne’e normal tanba demokasia tenke diskute tanba liuhusi diskute foin bele nia solusaun ne’ebé importante diskusaun ne’e manas iha fuan labele lori ba ulun ne’e tenke husi malirin bele deside buat ruma nune’e bele rezolve komunidade sira nia preokupasaun.
Esplika liután realidade ohin diskute malu iha karetina Tasi-tolu tanba atu rezolve komunidade afeita husi inundasaun, maibé diskute malu hotu ida-idak fila ba nia fatin ne’ebé husu ba deputadu sira bele halo karta bolu ba hatan iha tribunal nune’e esplika ba publiku bele diskute to’o iha ne’ebé lima la kona malu kakutak malirin atu deside hodi rezolve problema komunidade nian iha terenu.
Reportajen : Nelfiano
Foto : Nelfiano