Díli, 17 Fevereiru 2025 (Média Democracia) – Sekretariado Estado De Comunicação Social (SECOMS-Sigla portugues) husu ba jornalista sira atu servisu tuir kapasidade tolu ne’ebé importante, nune’e sai jornalista ne’ebé independente ba ema hotu. Lia-hirak ne’e SECOMS hato’o hafoin partisipa iha abertura formasaun ba jornalista sira, iha Salaun João Paulo II Comoro
Iha entrevista ho Sekretariu Estadu Komunikasaun Sosial Expedito Loro Dias Ximenes hateten, ohin hala’o abertura ba iha formasaun ne’e importante tebes ba iha kolega jornalista sira tanba hanesan jornalista no balun mós hanesan jestor ba media konvensional plataforma, formasaun ne’ebé fó husi konsellu imprensa ne’e importante tanba formasaun ohin mai ho nia tema debate nian.
“Ita hotu hatene katak agora daudaun teknologia avansadu tebes tanba ne’e jornalista sira presiza atualiza sira-nia performasa hanesan jornalista, nune’e presiza komprende kona-ba avansadu teknologia hanesan mosu plataforma intelejensia artifisial (AI) ida ne’e lori ita atu hatene di’ak liután prosesu espasu digital nian.” Lia-hirak ne’e hato’o husi Sekretariu Estadu Komunikasaun Sosial Expedito Loro Dias Ximenes
Nia hatutan governu fó apoiu makas ba iha Konsellu Imprensa atu formasaun ida ne’e bele lao ho di’ak, tanba haree iha ajenda ba treinamentu ida ne’e kolega jornalista sira sei aprende materia barak liu, materia sira hanesan debate televizivu, jornalista nia komprendesaun ba iha situasaun real ne’ebé lao iha nasaun ida ne’e, prosesu era digitalizasaun, tanba ne’e formasaun ohin lori jornalista sira atu bele prepara-an ho didi’ak atu bele hasoru dezafiu oioin ne’ebé sei mosu.
“Nonu-governu konstituisional nafatin fó atensaun ba iha formasaun, haree ba iha area digitalizasaun nian, nomos iha kontens sira ne’ebé iha relasaun ho mundu digitalizasaun, no ohin mós hau husu ba jornalista presiza iha kapasidade tolu ne’ebé importante, kapasidade intelektual jornalista tenke iha nia hanoin ne’ebé kritiku ba iha notisia ida, kapasidade profisional jornalista tenke partisipa iha formasaun oioin atu nune’e bele aumenta nia kapasidade nomos kapasidade tekniku atu nune’e jornalista ne’e tenke independente iha nia servisu tomak.” Tenik Sekretariu Estadu Komunikasaun Sosial Expedito Loro Dias Ximenes
Nia salienta husu ba jornalista sira presiza utiliza kapasidade tolu ne’ebé ohin mensiona ona no tuir formasaun sira ne’e ho di’ak atu nune’e bele hasoru dezafius sira ne’ebé mosu liuliu iha teknologia avansadu.
Reportajen ; Domingas
Foto : Domingas