Dili, 07 Outobro 2025 (Média Democracia) – Universidade Oriental Timor Lorosa’e UNITAL asina LOA “Lettter of Agriment” ho governu liuhusi Sekretariadu Estadu Kooperativa SECOP hodi halo peskiza espesifiku kona-ba Sorgu “Bafo Kairala” ne’ebé agora dadaun dezenvolve iha Munisipiu sira iha teritoriu Timor laran tomak.
Iha entrevista ho Reitor Universidade Oriental Timor Lorosa’e UNITAL Claudiu Navais hateten, Unital ohin hetan prevelioju boot ida husi governu liuhusi Sekretariadu Estadu Kooperativa Secop ne’ebé hili ona Unital sai hanesan instituisaun akademiku hodi foti sira sai parseiru ba servisu hamutuk.
“Ami sente kontente tebes tanba Unital hanesan Instituisaun akademiku ida hodi bele servisu no koopera ho governu liuhusi Secop servisu hamutuk hodi kontribui ideias balun husi akademiku nian liuliu ba peskiza espesifiku iha agrikultura, haree liubá Bafo Kairala hodi hamosu rezultadu ne’ebé di’ak, nune’e unital bele reforsa programa husi Secop nian. Lori Unital nia naran hakarak hato’o agradese ba Secop ne’ebe fó ona orientasaun ba Unital atu bele servisu hamutuk iha tempu tuir mai.” Dehan Reitor Universidade Oriental Timor Lorosa’e UNITAL Claudiu Navais
Reitor Unital informa, konserteza katak asina akordu servisu hamutuk ka asina LOA ida ne’e haree liubá kontiudu sira ne’ebé mais pratika liu, tanba ne’e antes Unital atu mai asina LOA refere ho Secop iha ona diskusaun lubuk ida ne’ebé halo ona entre instituisaun akademiku ho parte governu nian.
“Ohin Unital mai iha Secop hodi asina LOA (Letter of Agriment) katak akordu servisu kooperasaun aseita imediata ho diskusaun ida ne’e ami identifika katak servisu saida maka parte rua ne’e sei hala’o hamutuk. Entaun ami haree mós rekursu sira, Ita koalia ba rekursu ita tenke identifika mós rekursu umanu sira nomos rekursu ba orsamentu nian, entaun ohin Secop aprezenta ona kona-ba rekursu no aprezenta mós konaba peskiza espesifiku liu haree ba sorgu “bafo kairala” ne’ebé agora daudaun dezenvolve ona iha munisipiu sira.” Informa Reitor Universidade Oriental Timor Lorosa’e UNITAL Claudiu Navais
Hatutan husi Sekretariu Estadu Kooperativa Arsenio Pereira da Silva hateten, Governu liuhusi Secop ohin asina LOA (Lettter of Agriment) hodi servisu hamutuk ho instituisaun akademika Unital hodi bele implementa peskiza espesifiku ba bafo kairala nian ne’ebé agora daudaun lao ona iha munisipiu sira iha Timor-Leste.
“Servisu hamutuk ho instituisaun akademika Unital sei halo mundansa ba agrikultura hanesan ho lema Secop nian katak “servisu hamutuk halo mudansa ba iha rai ida ne’e,” Deste tinan kotuk ita hahu ona ho diskusaun entre parte rua atu nune’e bele realiza akordu ruma hodi nune’e bele implementa programa liuliu ba iha peskiza nian.” Dehan Sekretariu Estadu Kooperativa Arsenio Pereira da Silva
Secop reafirma konteudu husi LOA ida ne’e atu halo peskiza liuliu ba sorgu nian ka agora daudau konesidu ho “bafo kairala” atu nune’e agrikultor sira inklui mós Secop bele hatene oinsa hasae produsaun iha rai laran.
“Durante tinan barak nia laran ita koileta barak iha bafo kairala, maibé ita seidauk hatene fini di’ak maka oinsa, fulan saida maka bele halo koileta, Entaun Secop hanoin katak servisu hamutuk ho Unital sei halo peskiza ba asuntu importante sira ne’ebé liga ho bafo kayrala, nune’e bele fó rekomendasaun ba produtor sira.” Reafirma Sekretariu Estadu Kooperativa Arsenio Pereira da Silva
Nia afirma, peskiza refere teknikamente Unital maka sei halo no sira maka sei identifika fatin ida ne’ebé sira atu ba halo peskiza, tanba atu deside halo peskiza iha fatin ruma mós tenke mai ho ninian termu referensia haree ninia planu atu halo iha ne’ebé no rai ne’e medida hira, entaun peskiza ne’e tenke tuir akademika nian.
“Desizaun hotu husi Universidade, tanba akordu ne’e liu tiha minutu balun sai ona hanesan Lei ida ne’ebé kesi servisu hamutuk ho parte rua, entaun depende orsida ninia orariu husi peskizador, no akordu peskiza espesifiku bafo kairala ne’e hala’o durante tinan rua.” Afirma Sekretariu Estadu Kooperativa Arsenio Pereira da Silva
Secop foin dahuluk asina akordu LOA ho universidade akademiku Unital no universidade sira seluk ne’e seidauk tanba Secop sei halo hela aprosimasaun entaun Unital maka prontu hodi halo servisu hamutuk ho secop.
Esplika kle’an liután katak ohin Universidade Oriental asina akordu Litter of Agriment hamutuk ho Sekretariu Estadu Kooperativa kona-ba peskiza espesial bafo kairala, hodi bele hatene kualidade produsaun ne’ebé mak di’ak atu nune’e rekomenda fali ba produtor sira.
Reportajen : Domingas
Foto : Domingas