Dili, 21 Agostu 2025 (Média Democracia) – Sekretariu Estadu Formasaun Profesionál no Empregu SEFOPE realiza serimonia despedida ba estajiadu ne’ebé atu ba estajiu profisional iha Jogyakarta Indonézia, Aleinde ne’e mós SEFOPE hakarak deklara kona-ba prosesu rekrutamentu Traballador Korea nian no klarifika mós kestaun publiku nian relasiona ho traballador Australia ne’ebé valor kiik maibé bele hetan oportunidade ba servisu iha Australia.
Sekretariu Estadu Formasaun Profesionál no Empregu (SEFOPE), Rogério de Araújo Mendonça, hateten, relasiona ho prosesu rekrutamentu traballadór Timor-oan bainhira atu ba servisu iha Korea ne’e laos desizaun SEFOPE nian maibé sei determina husi Diresaun Rekursu Umanu (HRD) Korea nian.
“Ha’u hanoin husi parte Embaixada, adidu ho SEFOPE rasik mós esforsu maka’as tebes kona-ba ita-nia kandidatu sira-neʼebé liu ona atu ba servisu iha rai liur ne’e presiza halo nafatin kontaktu ho HRD Korea nomos empregadór sira, nune’e bele hetan oportunidade.” Dehan Sekretáriu Estadu Formasaun Profissional no Empregu ba jornalista sira iha salaun VIP SEFOPE
Sekretariu Estadu hatutan, loloos ne’e SEFOPE mós reklama hela maibé husi HRD Korea mak fó kuantidade ida-neʼebé limitadu, entaun SEFOPE sei hein no laos dehan traballadór sira la ba ona ne’e lae, maibé sei fazeadamente sei hetan oportunidade bele ba servisu iha rai liur.
“Tanba ne’e kuota ba nasaun hira ne’ebé sira presiza ne’e ho kuantidade ne’ebé boot tebes signifika katak traballadór balun ne’ebé seidauk ba ne’e sei hetan fali oportunidade iha futuru oin mai hodi ba servisu iha rai liur.” Hatutan Sekretáriu Estadu Formasaun Profissional no Empregu
Sekretariu Estadu afirma, iha biban ne’e mós informa ba públiku kona-ba protesta valór ki’ik maibé bele ba servisu iha Austrália, kestaun ida-ne’e públiku tenke haree informasaun ho di’ak uitoan kona-ba traballadór balun ne’ebé valór ki’ik maibé bele ba servisu iha Austrália, tanba SEFOPE iha ninia sistema.
“Ha’u hateten ba públiku durante ne’e ha’u mós rona dehan traballadór ne’e mai husi Munisípiu Viqueque, entaun ha’u hanoin katak prosesu sira ne’e ita presiza buka hodi haree fila-fali faktu loloos katak ninia valór menus mak nia ba ne’e ka husi faze reklamasaun nian.” Afirma Sekretáriu Estadu Formasaun Profissional no Empregu Rogério de Araújo Mendonça
Sekretariu Estadu haktuir, relasiona ho kandidatu balun ne’ebé sente katak iha ezame hetan valór ki’ik no ladun satisfas ho sira-nia valór ne’ebé iha bele halo reklamasaun nune’e bele hetan oportunidade hodi ba servisu iha rai liur.
Esplika liután tuir dadus ne’ebé Sekretáriu Estadu ne’e simu husi diresaun sira hateten, iha kandidatu na’in-100 resin mak halo reklamasaun no kandidatu ida-neʼebé daudaun servisu iha Austrália mós hola parte iha lista dadus reklamasaun ne’e hotu.
Reportajen : Nelfiano
Foto : Nelfiano