Dili, 14 Fevereiru 2025 (Média Democracia) – Sekretáriu Estadu Formasaun Profesionál no Empregu (SEFOPE), liuhusi Diresaun Nasionál Empregu Temporál fó formasaun ba formandu sira husi Sentru Formasaun Grace For Development (GFD), hamutuk na’in 300 resin, bazeia ba traballadór hirak ne’ebé hakarak ba servisu iha Nasaun Australia no Corea.
Diretór Sentru Formasaun Grace For Development Hilário Gusmão Fraga hateten, agradese tanba GFD hetan oportunidade husi SEFOPE hodi fasilita formasaun ba formandu sira husi sentru formasaun GFD nian, liliu ba foin sa’e Timor-Oan ne’ebé hakarak aprende.
“Oportunidade ida ne’e kapás tebes ba ita-nia joven Timor-Oan ne’ebé mai aprende iha sentru formasaun, formasaun ida ne’e klaru katak ne’e papél husi SEFOPE mai hato’o nia papél ba iha ita-nia joven sira liliu kona-ba kria kampu traballu ba sira ne’ebé atu halo negósiu nomos ba sira ne’ebé hakarak ba servisu iha rai liur, liuliu ba iha Corea no Australia.” Dehan Diretór Sentru Formasaun GFD ba Jornalista sira iha Salaun Parokia Balide Sexta ne’e
Tanba ne’e papél husi SEFOPE mai fahe informasaun ba joven sira, depois ne’e kona-ba estajiu profesionál ne’ebé formandu sira halo durante fulan rua iha instituisaun governu no instituisaun privada sira.
Nia informa katak formandu hirak ne’e husi Sentru Formasaun GFD ne’e rasik, enkuantu formandu hirak ne’e husi estudante tinan 2025 ne’ebé ho totál 300 liu atu tuir ezame.
Nia afirma katak hafoin rona informasaun husi parte relevante hodi ko’alia kona-ba emprendedorismu liuliu haree ba iha área negósiu nomos área servisu iha Rai liur.
“Area servisu ba iha Austrália depois ba iha Corea nian, ida ne’e mak sira fó mai, liuliu ba estudante sira ne’ebé foin remata, se karik iha inisiativu atu halo negósiu ruma sira bele komunika para bele tuir kursu durasaun fulan 3, iha ne’e kursu Corea mak durasaun fulan 6.” Nia afirma
Diretór nia esperansa ba Joven Timor-Leste katak depois remata iha formasaun ne’e bele hetan kampu traballu balun ba servisu iha Rai liur no balu bele loke rasik nia kampu traballu ba nia-aan nomos ba komunidade sira.
Iha fatin hanesan Téknika Profesionál Diresaun Nasionál Empregu Temporál SEFOPE Cezaltino de Jesus Guterres haktuir, papél SEFOPE nian enjerál mak formasaun no traballu, alvu prinsipál tolu mak formandu sira husi sentru formasaun sira, finalista husi ensinu sekundáriu no finalista ensinu tékniku profesional.
“Ami-nia alvu sira ba programa sira ne’ebé liga ho sira-nia nesesidade formasaun no empregu, la’os servisu rai laran de’it maibé iha mós servisu rai liur, ne’e ba area ne’ebé gradua formadu ona husi sentru formasaun sira nomos husi eskola tékniku profesionál no ensinu sekundáriu jerál.” Haktuir Téknika Profesionál
Nia informa katak husi diresaun ne’e rasik iha programa ida ho naran Programa Altu Empregu ne’ebé nia alvu mak sentru formasaun sira hodi eleva formandu sira-nia abilidade.
“Nune’e sira bele eleva di’ak liután sira-nia abilidade ne’ebé iha no sira bele kria servisu ba sira-nia-an rasik, hodi nune’e aumesmu tempu bainhira sira-nia negósiu ka sira-nia empregu ne’e la’o di’ak karik, sira mós bele emprega tan ita-nia maluk sira ne’ebé presiza servisu ne’e, sira dehan katak sira mós kontribui ona ba redusaun desempregu iha ita-nia rain.” Nia informa
Pesoál Téknika Profesionál Diresaun Nasionál Empregu Temporál ne’e mós informa katak formasaun ne’ebé ohin fó ba formadu husi sentru formasaun Grace For Development sira ne’e ko’alia kona-ba asuntu tolu hanesan Empregu, Formasaun no Traballu, ne’ebé molok atu ba empregu tenke buka uluk formasaun lai, nune’e foin bele hetan traballu ne’ebé ho dignu nomós tenke bazeia ba Dekretu Lei traballu ne’ebé SEFOOE fó sai.
Reportajen : Estefania
Foto : Estefania